Rokstu sagataveja: portals lakuga.lv

Latgolys regionaluo televizeja (LRT) dreiži nūslēgs itūvosor aizsuoktuo raidejumu cykla “Latgales pūra lāde – atdzimšana” puorraidi. Catūrtū i pādejū raidejumu par Latgolys dzīduošonys, eipaši apdzīduošonys tradiceju varēs vērtīs 2. i 4. novembrī kanalā TV24, taipat ari 5. novembrī ReTV kanala vierszemis apraidē.

Projekts “Latgales pūra lāde – atdzimšana” viestej par senejūs tradiceju īdzeivynuošonu, kulturys montuojuma atjaunuošonu i saglobuošonu Latgolā. Kotrā raidejumā teik atspīgeļuots senejūs tradiceju atjaunuošonys process, tūs eistynuotuoji i izmontuošona myusu dīnu sabīdreibā, taipat ari skaidruots viesturyskais aspekts i perspektivys iz prīšku.  

Catūrtajā aba pādejā raidejumā tiks viesteits par Latgolys dzīduošonys tradiceju. Eipaši izceļama ir taišni apdzīduošona – unikala tradiceja, kas ir iz pagaisšonys rūbeža.  

Raidejuma komanda kūpā etnomuzykologi Ilzi Freibergu i folklorys dzīšmu i deju kūpys “Svātra” vadeituoju Sarmeiti Teivāni gasteis pi apdzīduotuoju – Augšdaugovys nūvodā dzeivoj tradicejis nesiejis Buorbola Marcinkeviča i Biruta Uozuoliņa (Ozoliņa), sovutīs Preiļu nūvodā byus sasatikšona ar etnografiskū ansambli “Naktineica”, kas pasadaleis sovuos zynuošonuos i pīredzē par apdzīduošonys tradiceju. Tykuši īvuokti vierteigi audio, video, foto i interveju materiali, kas piečuok ļaus apkūpuot dabuotū informaceju i sagataveit dasacejumu apdzīduošonys tradicejis īkļaušonai Nacionalajā namaterialuo kulturys montuojuma sarokstā.

Taipat Latgolai rakstureigū dzīduošonu i muziciešonu aktivai pīkūp Daugovpilī – raidejums apmeklēs vīnu nu folklorys dzīšmu i deju kūpys “Svātra” mieginuojumu Daugovpiļs Vīneibys noma Tradiceju sātā i vaira īpazeis tuos dziniejspāku Sarmeiti Teivāni, kura aizaraun ari ar daudzim cytim storptautyskim projektim, kab boguotynuotu i styprynuotu latvīšu tradicionaluos kulturys izpausmis.

Projekta “Latgales pūra lāde – atdzimšana” mierkis ir sataiseit četrus televizejis raidejumus par četrom senejom tradicejom i tūs veidūlu myusu dīnu kulturā, turysmā i izklaidis jūmuos. Kotrā raidejumā teik atspīgeļuoti pīmāri, kai senejuos tradicejis teik atjaunuotys myusu dīnu vidē – pīmāram, plūstuošonys tradiceju populariziešona Daugovys lūkūs, tradicionalūs iedīņu meistarklasis i tūs nūviertiejums Eiropys Savīneibys leiminī, taipat ari dzīduošonys tradiceju izzynuošona – teicieju apzynuošona i dzīšmu kruojumu veiduošona, kai ari vysaidu omotu prašmu meistarklasis. #SIF_MAF2025

Raidejumu “Latgales pūra lāde – atdzimšana” varēs vērtīs: svātdiņ, 2. novembrī, kanalā TV24 21.30 stuņdēs. Atkuortuojums – ūtardiņ, 4. novembrī, kanalā TV24 12.30 stuņdēs. Trešdiņ, 5. novembrī, 17.30 stuņdēs raidejumu varēs vērtīs ari ReTV vierszemis apraidē. Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgales pūra lāde – atdzimšana” saturu atbiļd SIA “Latgales reģionālā televīzija”. #SIF_MAF2025