Rokstu sagataveja: portals lakuga.lv

Postfolklorys grupa “Rikši” 15 darbeibys godu garumā dabuojuse gona plotu atpazeistameibu vysys Latvejis mārūgā. Kab nūsvieteit itū pastuoviešonys jubileju, grupa aicynoj iz koncertu aba balleiti “Vīns – Pīci” 2026. gods 10. janvarī Latgolys viestnīceibā “Gors”, Rēzeknē, viestej publiski daīmamuo informaceja.

“Rikši” viestej, ka laikam jau grupu ar “vīns-pīci” godu stāžu navarātu vaira saukt par jaunīšim, tok dzimšonys dīnā kai i kuorteigā latgalīšu balleitē – vysi jauni. Byus dzīsmis kuruos īsaklauseit, dzīsmis, kurom bolsā dzīduot leidza, i taidys, pi kurūs drūsai dreikstēs kustētīs i doncuot leidza. Grupys puorstuovi sūlej, ka koncerta repertuarā byus dzīsmis ar 15 godu stažu i taipoš ari nazkas svaigs, kas taps pavysam naseņ. Taipoš byušūt ari īskots tūpūšajā bārnu dzīšmu programā. Eisuok sokūt – janvara suokuos iz Latgolys viestnīceibys “Gors” skotivis byušūt eistyna Latgolys vosorys uora balleitis sajiuta. Beleti daīmami ITE.

“Pamatā jau mes kotrys asam vīns – ar sovu redzīni, veiduotu nu tuo, kū mes poši i myusu seņči pīdzeivuojuši. Kleist kotrys vīns, leidz saīt kūpā pīci, pīmāram. Suoc runuot, spēlēt, svinēt kūpā saīšonys, koncertus, braucīņus. Saprūt, ka teiri labi kūpā pateik pavadeit laiku i redzīņs sakreit. Vīns pulsiejums par kūpeigim uzskotim i stuostim tuoļuok – muzykā, Latgolā, postfolklorā,” stuosta grupa “Rikši”. “Nu tai, lai kotrys vīns, kas atguojs, sajiut, ka myusu – sovys zemis, sova pyura i sovys dzeivis meiļuotuoju – ir vaira nakai pīci. I vysi kai vīns.”

Postfolklorys grupys “Rikši” sastuovā ir pīci dalinīki – Ēriks Zeps (bolss, akordeons), Madara Broliša (bolss, vejūle), Ivars Utāns (basgitara), Mārcis Lipskis (mandolina) i Jurgis Lipskis (bungys). Sovys pastuoviešonys laikā grupa ir koncertiejuse gondreiž vysuos Latvejis piļsātuos, ari lelā daļā cīmu. Grupys dalinīku bolsi izdzīduojuši “Noriet saule”, “Vot i puiseits”, “Lobs vokors”, “Īveņu”, “Kamudzi” i vēļ daudz cytu latgalīšu dzīšmu. Grupa pīsadalejuse vysaiduokūs festivalūs i dzīšmu i deju svātku nūtikšonuos. Daņči spālāti kai nūmetnēs Latvejā, tai ari gostūs pi diasporys latvīšim cytvīt.