Rokstu sagataveja: portals lakuga.lv

Luočplieša dīnā, 11. novembrī, Rēzeknis nūvoda vokaluo grupa “Skonai” klauseituoju viertiejumam nūdūd sovu jaunuokū veikumu – “Muote dieleņu auklēja”, kas ir grupys muokslinīcyskuos vadeituojis Guntrys Kuzminys-Juknys veiduotuo tautysdzīsmis apdare.

“Dzīsme ir par vierteibom, kas vys vēļ dzeivoj myusūs i vīnoj paaudzis. Kai simbolisks tylts bejušuo i asūšuo vydā – storp tautys styprumu, muotis syltumu i saknem, kas myus vīnoj. Par muoti – dzeiveibys, spāka i syltuma puortu, kura auklej na tik bārnus, tok ari myusu tautys goru i myusu zemi. Dziļā pateiceibā i pīmiņā!” viestej vokaluo grupa “Skonai”.

“Munā kompoziceju ideju sarokstā itei tautysdzīsme jau seņ gaideja sovu kuortu. Tautysdzīsmei beja sovs laiks, vīta. Tei topa munā dzymtajā vītā – Bieržgalī, pi munu meiluokūs klavīru. Vaļsts svātku mieness vysod maņ ir bejs cīši aizkustynūšs i svareigs. Patīseibā svareigs mums vysim, jo latvīši eistyn ir pīruodejuši, ka spiej byut patīsi vīnuoti, i itymā trauslajā breiveibys laikā, tys ir cīši svareigi. Dzīsmē gribieju atspīgeļuot ari muotis syltumu, puordzeivojumus, sajiutys, saimis vierteibys – kod mes auklejam sovus bārnus i izaudzynojam jūs par krītnim cylvākim – ar vierteibom,” tai “Skonai” muokslinīcyskuo vadeituoja Guntra Kuzmina-Jukna.

Īroksts sataiseits sadarbeibā ar producentu Girtu Ločmeli, tok video veiduojs operators Ivars Utināns. Eipašu paļdis “Skonai” soka Rēzeknis Sv. Treisvīneibys evaņgeliski luteriskuos draudzis cylvākim i Oskaram Buļam.