Rokstu sagataveja: portals lakuga.lv

Itymā nedeļgolā, balansejūt storp adventa laika klusū, tok prīceigū Kristus dzimšonys gaideišonu i laiceigom kulturys nūtikšonom, byut Latgolā nu Bolvu da Daugovpiļs aicynoj “Divu krastu radio” Ziņu nūdalis vadeituoja, Latvejis Radejis Latgolys studejis uorštata autore Laura Sondore.

Tradicionalī namaterialuo kulturys montuojuma svātki i etnoroks

Sastdiņ, 6. decembrī, Bolvu nūvoda Upītē tradicionali svieteis namaterialuo kulturys montuojuma svātkus “Gūdi”. Itūgod svātku koncertā pīsadaleis ari Dailis teatra dzīdūšūs akteru kurss ar dzīsmem nu izruodis “Meža gulbji” jaunūs aranžiejumūs, kū kūpā ar akterim izpiļdeis folklorys kūpa “Upīte”, sovpus pasuokumu vadeis Baļtinovys amaterteatra “Palādas” akteri. Piec ceremonialuos dalis vysi teik aicynuoti iz daņčim ar kapelu “Augusti”. Sovpus Rēzeknē, Latgolys viestnīceibā “Gors”, Latvejis etnoroka veterani “Laimas Muzykanti” 6. decembrī ar latgaliskū jaudu i sirsneigu koncertu svieteis 30 godu skotivis darbeibys jubileju. Par gūdu itai nūtikšonai izdūta grupys vysu laiku popularuokūs dzīšmu izlase “”Laimas Muzykanti” 30 – zalta dzīsmis”.

Dabasu pušu nakts puorguojīņs

I vēļ 6. decembra vokorā (ar startu ostoņūs vokorā pi Rēzeknis nūvoda Lūznovys muižys) ir vareiba dūtīs Rēzeknis nūvoda Dabasu pušu nakts puorguojīnī, kurymā nūskaņom boguotā 19 kilometru garā pastaiguošonā tiks savīnuotys divejis muižys – Lūznovys i Zosnys. Pasuokuma organizatori sūlej, ka nakts puorguojīņa laikā varēs izbaudeit Lūznovys muižys parka muzys, klusuos meža stygys storp Lūznovu i Zosnu, Zosnys azara skanis, gunkura kūršonu Zosnys azara krostā i nakts mīru.

Svātku prīca Daugovpilī

Sovpus Daugovpilī storp sapynu galaktikom, zvaigznuojim, tyukstūšom gaismeņu lelajā svātku eglē aicynoju paturēt sirdī ituo gods Daugovpiļs Zīmyssvātku tematiku: “Tu esi atbiļdeigs par tū, kū esi daradynuojs.” Na viņ tagad, adventā, bet i kasdīnā, sevkurā šaļtī, napagaisynuosim ciļvieceibu.