Rokstu sagataveja: portals lakuga.lv

Pi skaiteituoju tics žurnala “A12” decembra/janvara numers, i tymā var puorskaiteit intervejis ar muokslineicom Gertrūdi Zeili i Agru Ritiņu, muziki Aivaru Broku, arhitekti Martu Venteri i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce tuo īvodā roksta: “Tycūt gaismai i tīcūtīs iz tū, juoatguodoj – myusūs pošūs dag moza guņteņa. Mes spiejam tū kūpt i sorguot, kab tei byutu spūdra i teira. I, ka spiejam byut kūpā i nasabeistam līsmuot ar sovu īškejū gaismu, pasauļs palīk gaišuoks. Tod gaismu pamona ari tī, kas nūsablūdejuši “vyss nalabi” dzeivis leikumā i vaira naredz prīškā optimisma spaitu.”

Goda tymsuokajā laikā žurnals aicynoj skaiteituojus iz īškejū gaismu i seve mekliejumim Latgolys cylvāku pīredzē, kulturā i kasdīnys stuostūs. Itymā numerī:

• Vuoka personeiba ir gleznuotuoja Gertrūde Zeile. Skaitit par muokslineicys īškejū pasauli, rodūšumu i vysod aktualū vaicuojumu – kai saglobuot pīdareibu vītai i gaismu sevī.
• Aivars Broks intervejā reflektej par izgleiteibu, sabīdreibys dūmuošonu i lojalitati, kas stuov puori tauteibom i volūdom.
• Interveja ar Antoninu Ostrovsku – gaišs portrets par dzeivi Maltā, par ticeibu, sirsneibu i kūpīnys spāku, kas paleidz nūturēt vītejuos tradicejis.
• Arhitekte Marta Ventere Dagdā radejuse sasatikšonys punktu, kur atkluot pīrūbeža daudzveideibu i kruošņumu.
• Sieņu pasauļa atkluojumi ar Marinu Šlapakovu-Pjankovu. Stuosts par mežu daudzveideibu i boguoteibu tepat Latgolā.

Numurā skaitomi ari roksti par Kruoslovys muzeja duorgumim, Kārļa i Ingys Brūveru dzeivi lauku klusumā, kulinarū montuojumu, kai ari plots kulturys nūtikšonu i izstuožu apskots.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – portala redaktore Laura Melne ir autore rokstim par arhitekti Martu Venteri i rakstneicu Mārīti Tabitu Kalniņu, sovutīs Amanda Anusāne ir fotografeju autore rokstam par Marinu Šlapakovu-Pjankovu. Žurnalā ir vareiba izzynuot vaira par latgalīšu kulturys kusteibu “Volūda”, tymā skaitā ari portalu lakuga.lv. Taipat tymā puorskaitoma portala redakcejis sagataveituo informaceja par jaunuokajim gruomotu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.