Izsludynuoti “Vuolyudzāni” i latgalīšu volūdys olimpiade
Rokstu sagataveja: portals lakuga.lv
25. aprelī Rēzeknis Vaļsts 1. gimnazejā nūtiks skotuvis runys konkurss “Vuolyudzāni” i atkluotuo latgalīšu rokstu volūdys i kulturviesturis olimpiade, informej Latgalīšu volūdys, literaturys i kulturviesturis školuotuoju asociacejis vadeituoja Veronika Dundure.
Veronika Dundure pastreipoj, ka konkursa i olimpiadis mierkis i aizdavumi ir formulāti nūlykumūs, bet golvonais ir, lai jaunīši laseitu latgaliski i pareizi raksteitu, īvārojūt pareizraksteibys nūsacejumus, partū ka parosti lela daļa sasazynoj latgaliski.
Skotuvis runys konkursā “Vuolyudzāni” aicynuoti pīsadaleit pyrmsškolys vacuma bārni, 1.–12. klašu školāni, ari studenti. Kotram dalinīkam juosagatavej diveju daildorbu fragmenti latgaliski. Pīsokūt školānus skotuvis runys konkursam “Vuolyudzāni”, teik aicynuots īvāruot pīteikuma praseibys. Taipat kai paguojušajā godā teik lyugts izavielēt fragmentus nu jaunuokuos latgalīšu literaturys.
Skotuvis runys konkursa “Vuolyudzāni” nūlykums
Atkluotuo latgalīšu rokstu volūdys i kulturviesturis olimpiade nūtiks pīcuos kuortuos. Olimpiadis 1. kuortā aizdavumus latgalīšu rokstu volūdys zynuošonu puorbaudē jau 26. godu izstruoduos Latvejis Universitatis profesore Lidija Leikuma, bet tradicionalū 5.kuortys kulturtestu par svareiguokū Latgolys kulturys dzeivē 2025. godā pīduovuos portals lakuga.lv
Olimpiadis 2. kuorta byus veļteita latgalīšu rakstnīkam, sabīdryskajam darbinīkam i publicistam, pyrmuos latgalīšu avīzis “Gaisma” izdeviejam Fraņčam Kempam, bet 3. kuorta – latgalīšu rakstnīkam i kulturys darbinīkam Ontonam Rupaiņam. Itūgod 4. kuortys aizdavumi mudynuos jaunīšus īpazeit portala lakuga.lv ituo gods marta mieneša publikacejis. 2. – 4. kuortys rodūšūs aizdavumus pīduovuos RTU Rēzeknis akademejis profesore Ilga Šuplinska.
Pīsasaceit skotuvis runys konkursam i olimpiadei var da 2026. gods 16. apreļa, aizpyldūt iz izgleiteibys īstuodis veidlopys sataiseitu pīsacejumu i syutūt LVLKŠA iz e-postu ltgasoc@gmail.com.
Konkursu i olimpiadi organizej i atbolsta Vaļsts izgleiteibys atteisteibys agentura, Latgalīšu volūdys, literaturys i kulturviesturis školuotuoju asociaceja, Rēzeknis nūvoda pošvaļdeiba, Latgalīšu kulturys bīdreiba, Rēzeknis Vaļsts 1. gimnazeja, latgalīšu kulturys kusteiba “Volūda”, RTU Rēzeknis akademeja i latgalīšu kulturys ziņu portals lakuga.lv.
