Rokstu sagataveja: portals lakuga.lv

12. februarī Latgolys viestnīceibā “Gors” sevkurs interesents aicynuots apmeklēt III Storptautyskū etnodžeza muzykys ansambļu konkursu “Guoyu pa JAZZ”, informej muokslu izgleiteibys kompetencis centra “Latgolys Muzykys i muokslys vydsškola” (MIKC LMMV) puorstuovi. Konkursa mierkis ir veicynuot jaunūs muziku profesionalū izaugsmi, kai ari etnodžeza žanra i regionalūs tradiceju atteisteibu. Tymā itūreiz aicynuoti pīsadaleit kai muzykys vydsškolu audziekni, tai augstuokuos izgleiteibys īstuožu bakalaura leimiņa studenti.

Konkursa “Guoyu pa JAZZ” dalinīku aizdavums byus atskaņuot divejus dažaida rakstura skaņdorbus: sova apvyda tautysdzīsmi originalaranžiejumā i breivys izvielis skaņdorba originalaranžiejumu voi originalkompoziceju, kas īkļaun etniskuos muzykys elementus. Īīšona pasuokumā byus bez moksys, kas zeimoj, ka sevkuram interesentam byus vareiba nūsaklauseit vēļ nadzierdātus tautysdzīšmu originalaranžiejumus nu vysaidu Latvejis i uorzemu regionu, nu kurūs īt konkursa dalinīki. Taipat konkursa gaitai varēs sekuot leidza arī tīšraidē YouTube i Facebook. Ansambļu snāgumu viertēs storptautyska muziku žureja – Artis Orubs, Elvis Artūrs Lintiņš i Villu Talsi.

Dalinīki konkursam var dasasaceit da 22. janvara, aizpyldūt elektronisku anketu. Vaira informacejis par nūlykumu i dasasaceišonys kuorteibu var izzynuot MIKC LMMV sātyslopā.

Pyrmī diveji “Guoyu pa JAZZ” konkursi nūtyka 2023. i 2024. godā i jau davuši gona lelu pīnasumu latgaliskajai kulturai. Nu jau labi zynomais etnodžeza ansamblis “Bruoli i muosys”, kas pārņ izdeve debejis albumu “Na pādejais” tyka izveiduots 2023. gods beiguos Latgolys Muzykys i muokslys vydsškolā, gatavejūtīs 2. storptautyskajam etnodžeza konkursam “Guoyu pa JAZZ” – lūzejūt komandys, nu džeza i tradicionaluos muzykys nūdaļu audziekņu tyka sataiseitys divejis komandys. Tai grupys dalinīki najauši atroda cyts cytu. Piec tam, 2024. gods 8. februarī, sekuoja veiksmeiga daleiba itymā konkursā – dabuota 2. vīta i vareiba uzastuot prestižajā džeza festivalā “Saulkrasti Jazz 2024”, kas skubynuoja nanūstuot i turpynuot darbeibu.

Sovutīs 2023. gods konkursā Latgolys viestnīceibys “Gors” simpateju bolvu – vareibu uzastuot Latgalīšu kulturys goda bolvys “Boņuks 2023” ceremonejā sajēme ansamblis “Sipisnīks ar madu” ar dzīduotuoju Lauru Svikšu prīškgolā.

Atguodojūt pīredzi konkursā, Laura Svikša soka: “”Guoyu pa JAZZ” beja cīši šmuka, īdvasmojūša i leidz itai dīnai palykusi atmiņuos kai cīši spylgta pīredze. Suocūt ar pošu procesu i beidzūt ar konkursa dīnu. Vyss tik cīši rodūšai i muojeigai, daudz jaunu zynuošonu i īspaidu – na tik par rodūšū daļu, bet ari aizskotivis lītuos, skaņu lītuos. Dorbojūtīs i gatavejūt kompoziceju i aranžeju, poša deļ seve izzynuoju jaunus horizontus muzykā. Tai kai tūreiz spieliejom munu kompoziceju, beju puorpiļdeita ar pateiceibu i mīlesteibu, deļtuo, ka leidz tam nazynuoju, ka muna dzīsme var tik skaisti skanēt. Tagad vaira navaru īsadūmuot tai cytu skaniejumu, tūreiz vyss sasalyka pa vītom. I, prūtams, sajimt Latgolys viestnīceibys “Gors” simpateju bolvu – uzastuošonu “Boņukā” – beja cīši lela motivaceja kai studentam, kurs meklej sova ceļa, turpynuot dareit, raksteit muzyku. Tamā šaļtī saprotu, ka laikam jau asu iz pareizuo ceļa. Bet par vysu itū paļdis juosoka konkursam, īspiejai sevi paruodeit.”

Konkursa nūsaukums “Guoyu pa JAZZ” suokumā radeja vaicuojumus – kaidā volūdā tys eisti ir i kai juoizrunoj? Tūreiz organizatori skaidruoja: “Bolstūtīs iz gribiešonu izceļt taišni sovu regionu i tuo vierteibys, ari radīs, kai mes poši sokom, latgaliski angliskais konkursa nūsaukums “Guoyu pa Jazz” (nu tautysdzīsmis “Guoju pa mežu”). Parkū “guoyu”, na “guoju”? Partū, kab uorzemu dalinīki izrunuotu latgaliski pareizi (cytaiž byutu “guodžu pa džazz”). Storptautyskam konkursam storptautysks nūsaukums, tok ar pamateigu gribiešonu turētīs pi sovu dziļūs latgalīšu sakņu!”