Rokstu sagataveja: portals lakuga.lv

11. aprelī Rēzeknē, Latgolys Kulturviesturis muzejā (LKM), tyka atkluota kolekcionara, Latgolys patriota Juoņa Žugova kolekcejis izstuode “Juoņa Žugova Latgolys stuosts”. J. Žugovs ir dzims Rēzeknē, piečuok struoduojs i dzeivuojs Daugovpilī, tok nu jau ilgu laiku dzeivoj Reigā. Izstuodē ir vareiba apsavērt Latvejis profesionaluos keramikys muokslinīku dorbus, vacmeistaru gleznys, skulpturys, senejis gruomotys i dokumentus latgalīšu rokstu volūdā. Izstuode apsaverama da ituo gods maja beigu.

Vysaiduoku lītu kolekcioniešonu Juoņs Žugovs suocs jau školys laikā, tok nūpītnuok pi kolekcejis izveidis dasagivs jau piečuok, dagrīžūt eipašu viereibu lītom, kas atsatīc iz Latgolu. Izstuodē sasavyn Žugova dzymtys stuosts i Rēzeknis piļsātys viesture. Izstuodis apmaklātuojim ir unikala vareiba apsavērt ratus i izcylus prīškmatus: 20. godu symta 20.–30. godu Latvejis profesionaluos keramikys muokslinīku dorbus, vacmeistaru gleznys, skulpturys, senejis gruomotys i dokumentus latgalīšu rokstu volūdā. Vysi izstuodē apsaveramī prīkšmati ir vaira voi mozuok saisteiti ar Latgolu.

Interesanti, ka pats Žugovs sovulaik pīsavierss Latgolys keramikai, struoduojs ar muolu i pat sajiems Tautys dailomota meistara nūsaukumu. 1980. godā Žugovs tyka par Tautys lītišķuos muokslys studejis “Latgale” vadeituoju. Sovpus Rēzeknē jis vacuoku sātu beja puortaisejs par Latgolys keramikys i muokslys muzeju, kurū apmeklēja daudzi interesenti. “Latgolys Kulturviesturis muzejs iz itū izstuodi nu Daugovpiļs nūvodpietnīceibys muzeja, kurs niu ir Rotko muzeja puorziņā, deponēja Juoņa keramikys dorbus, mani eistyn puorsteidze dorbu formys i plastika,” stuosta LKM vadeituoja Anastasija Strauta.

“Kolekceja kūpumā ir daudz leluoka, tok ite es raudzeju paruodeit nu vysa pa druskai,” doluos Juoņs Žugovs. Jis stuosta, ka vacuokuo izstuodē radzamuo glezna ir Pētera Kalvis 1904. gods dorbs. P. Kalve ir autors, kura dorbu nav nivīna Latgolys muzeja kolekcejā. “Muns mierkis ir veiduot kolekceju nu taidu eksponatu, kuru nav nivīnā cytā Latvejis muzejā. Vierteiba ir navys tod, kod kolekcejā ir taidi prīškmati, kaidi ir vysim, tok, kod ir unikali eksponati, kaidu cytvīt nav. Es piečuok variešu papyldynuot muzeju kolekcejis ar sovejom,” tai Juoņs Žugovs. Vēļ izstuodē var apsavērt Kārļa Dannis gleznā attāluotū Viļaku, taipoš ari Alberta Kronenberga zeimiejumu ar Ludzu, kur radzami tuos kūka kuormi pyrma leluo guņsgrāka. “Vēļ vīns interesants dorbs ir Birutys Baumanis glezna nu cykla “Kāzas Latgalē” ar nūsaukumu “Pēcsvētku rīts” (1967). Gleznā var redzēt, ka jaunais puors nu kuozu drēbu ir puorsaviļcs vīnkuoršuokā apgierbā, iz golda ir aleņš, kačs ād zivteņu, muzykants vēļ spieļoj, tok vysulobuokais tāls ir tei kuņdze, kas guļ iz gultys ar mytru dvīli iz golvys, lai drupeit atsagiutu nu kuozu. Vīnvuordsokūt, ite kotram dorbam ir sovs stuosts, maņ kotrys nu itūs prīškmatu ir saisteits ar kaidu cylvāku voi nūtykumu, tei ir daļa nu munys dzeivis,” tai Juoņs Žugovs. Izstuodē apsaverami dorbi, kas atvasti nu Australejis, Amerikys i nu cytu vītu.

Kai jau pīmynāts, Juoņam Žugovam par kotru nu eksponatu ir sovs stuosts, tok vīnā gleznā ir radzams ari jis pats – kai mozs puiseits ar vejūli, kurs īt iz muzykys školu. “Tamā gleznā es pozieju Rēzeknis Muokslys školys, kura cyta storpā atsaroda ite pat, ituo muzeja niu jau vacajā ākā, studentim plenerā pi Odumovys azara Rēzeknis nūvodā. Tys ir školānu zeimiejums, juo muokslinīcyskuo vierteiba ir cīša zama, tok maņ tys ir cīši duorgs,” stuosta Juoņs Žugovs. Vīns nu izstuodis stendu ir veļteits ari Juoņa dzymtai, tī radzama juo tāva Ādolfa rokstommašyna i fotoaparats, saimē saglobuotuos saktys, kurūs kolekceju Juoņs plānoj nūvielēt sovai mozmeitai, vēļ ir saglobuots mamys tautys tārpa vaiņuceņš, kurs lykts golvā ari 1940. gods Latgolys Dzīšmu svātkūs Daugovpilī, saimis fotografejis i cyti prīkšmati. Stuostūt par izstuodis eksponatim, Juoņs atkluoj vēļ vīnu interesantu faktu – juo vactāvs Odums (Ādams) beja pūļs, juo pavuorde beja Žukovskis, tok, kai stuosta Juoņs, cara laikūs uzvuordu puortaisejuši iz niulejū.

Izstuode Latgolys Kulturviesturis muzejā Rēzeknē apsaverama da ituo gods maja beigu.

Fotogalerejā kartenis nu izstuodis “Juoņa Žugova Latgolys stuosts”. Foto: Amanda Anusāne/portals lakuga.lv