Rokstu sagataveja: portals lakuga.lv

Jau 18. reizi aprelī vysā Latvejā nūteik kasgadejais pasuokums “Satiec sovu meistaru!”, kura laikā sevkurs interesents teik aicynuots gostūs pi meistaru, kab īpazeitu i paraudzeitu vysaidys tradicionalūs omotu prasmis. Latgolā i Sielejā meistari interesentus gostūs gaideis 25. i 26. aprelī, viestej organizatori.

Pasuokumu “Satiec savu meistaru!” kūpeigi reikoj Latvejis Nacionalais kulturys centrys (LNKC), pošvaļdeibys i omotu meistari. Itūgod tys puļcej meistarus i “muocekļus” vaira nakai 232 vītuos, kur dorbojās ap 250 meistaru. 11. i 12. aprelī meistarus jau varēja satikt Kūrzemē i Zemgalē, 18. i 19. aprelī – Vydzemē i Reigā, tok itys nedeļgols, 25. i 26. aprelī, īplānuots nūtikšonom Latgolā i Sielejā.

Akcejis golvonais aizdavums ir izceļt cylvākus, kas puormontuojuši i saglobuojuši senejuos prasmis nu paaudzis paaudzē, i veicynuot plošu sabīdreibys leidzdaleibu Latvejis namaterialuo kulturys montuojuma saglobuošonā.

Pasuokuma nūslāguma nedeļā, 25. i 26. aprelī, daudzi vysaidu meistaru darbneicu byus Latgolā i Sielejā. ITE daīmama meistaru karte, kurā var vaira izzynuot par kotru aktivitati i dasasaceit tai, sasazynojūt ar meistaru telefoniski voi car e-postu. Taipat ITE daīmams vyss saroksts, kurā aktivitatis sadaleitys pa nūvodim. Latgolys tradicionaluos prasmis itūgod puorstuov Bolvu, Augšdaugovys, Kruoslovys, Leivuona, Ludzys, Preiļu, Rēzeknis nūvodi i Daugovpiļs piļsāta.

Pīduovuojums itūgod cīši daudzveideigs: leidzeigi kai cytur Latvejā byus vareiba īpazeit vysaidys tekstilmuokslys tehnikys i rūkdorbus, tymā skaitā adeišonu, ausšonu, tamburiešonu, fiļciešonu i peišonu, kai ari vuiceitīs vysā unikalys prasmis, par pīmāru, meldru viervu veišonu, kludzeņu i slūksneišu peišonu i uodys rūtu izgataveišonu. Rodūšajuos darbneicuos varēs paraudzeit ari puzuru taiseišonu, vuiceitīs aromatu pasauli, dekupažu, vitražu taiseišonu i zīpu vuoriešonu. Taipat varēs vuiceitīs ari kaļva prasmis, keramiku, kūkapstruodi i kūka grīzšonu, tok nu kulinaruo montuojuma – ols bryuviešonu, kopeja taiseišonu, capumu cepšonu i šmakovkys degustiešonu. Tautys muzykys tradicejis puorstuovēs tradicionaluo muziciešona, dzīduošona i pat apdzīduošona. Vysubeidzūt rodūšū viestejumu veiduošonu paleidzēs īpazeit ari nūdarbeibys stuostnīceibā i leļu teatra veiduošonā. I, prūtams, nūtiks ari tradicionaluos Latgolys pūdnīku dīnys, par kurom vaira vari izzynuot ITE.

“Dūdūt i jamūt – vuicūt i vuicūtīs omotu prasmis – mes boguotynojam sevi i kūpā saglobojam Latvejis kruošņū i dažaidū namaterialū kulturys montuojumu. Lai pasuokums “Satiec savu meistaru!” arviņ ir lobs pamudynuojums pavasarī apceļuot Latveju, satikt prasmeigus, zynuotkuorus i īdvasmojūšus cylvākus!” vielej LNKC tautys lītiškuos muokslys eksperte Linda Rubena.