Rokstu sagataveja: portals lakuga.lv

Maja gols jau četrdpadsmit godu īsazeimej kai Latgolys viestnīceibys “Gors” svātku laiks – 2013. gods 29. i 30. majā Rēzeknē atkluota koncertzāle, kas ar sovu dorbu palykuse par spūdru pīmāru cytom kulturvītom Latvejā i lapnumu pošim latgalīšim. Itys gods “Goram” suocēs ar puormainis nasūšim Rēzeknis vaļstspiļsātys dūmis lāmumim, i niu teik gaideits, kod Saeimā suoks vērtīs koncertzālis tuoļuokajai darbeibys formai veļteitu lykumprojektu. Bet kluotyn otkon maja gols, “Gora” svātku laiks, deļtuo itai nedeļai kulturys īsacejumus sagatavejuse Latgolys viestnīceibys “Gors” muokslinīcyskuos i pasuokumu nūdalis vadeituoja, koncertzālis vaļdis lūcekle, pedagoge i komponiste Ilona Rupaine.

Piļsātys suņs Latgolys laukūs

Latvejis Leļu teatra izruode “Sunāns!” ir stuosts par piļsātys suni, kurs kaidu dīnu teik Latgolys laukūs, kur vyss smuordoj i garšoj cytaiži, kur vysi ari runoj i draudzejās cytaiži. Pa munam, vysu lobuokais kompliments par itū izruodi ir kaida Reigys bārna sajiusmynuotī i gaidu pylnī vaicuojumi piec izruodis par temu “Kod mes brauksim iz Latgolu?”, kam Latgola jam ruodejuos eistyna breinumu i pīdzeivuojumu zeme. “Mam, brauksim dreižuok, kam vosorā tī byus par daudzi cylvāku (vysi tok gribēs tikt itamā tuolajā breinumu zemē)!” naatlaideigi nastuoja itys jaunais teatra apmaklātuojs. Aicynoju īpasazeit ar Sunānu i juo īpazeitū Latgolu i latgalīšu volūdu, īmūt kai iz Latvejis Leļu teatri Reigā 26. majā, tai nūsaverūt izruodi Rēzeknē, Latgolys viestnīceibā “Gors”, 27. majā.

Stuosti ap naudu, sapynim i vydabolsu

Andruss Kivirehks ir vīns nu zynomuokūs i latvyski vysu vaira tulkuotūs myusu dīnu igauņu rakstnīku. Juo dorbūs virtuozi sasavyn humors, ironeja, absurds i groteska. Ituos temys ir eipaši tyvys ari Rēzeknis Tautys teatra režisorei Mārai Zaļaiskalns. Rēzeknis Tautys teatra taiseitū izruodi, kas pyrmizruodi pīdzeivuojuse pārnejuo gods golā, “Stāsti par naudu, sapņiem un sirdsapziņu” piec Andrusa Kivirehka “Seši monologi ap naudu” varēs nūsavērt 28. majā 18.30 stuņdēs Rēzeknis Nacionalūs bīdreibu kulturys nomā. Stuostus ap naudu, bet eistineibā – ap cylvākim stuosteis Rēzeknis Tautys teatra akteri: Sandra Juste, Jolanta Leitāne, Ināra Apele, Sandis Sprudzāns, Kaspars Baluodis (Balodis), Oskars Lustiks.

Pyutieju orkestru svātki

Tū, ka Bolvu nūvods ir Zīmeļlatgolys tradicionaluos kulturys centrys, var izzynuot, puorskaiteit, pīredzēt i izgaršuot, bet tū, ka Bolvi ir Latgolys i Austrumlatvejis pyušamūs instrumentu spālātuoju citadele, var stypri i tuoli sadzierdēt. Jau vairuokys godu desmitis ar īvārojamim sasnāgumim itamā piļsātā dorbojās dalinīku skaita ziņā vīns nu leluokūs orkestru – pyutieju orkestris “Balvi”. Taišni ituo kolektiva muokslinīcyskais vadeituojs i golvonais dirigents Egons Salmanis byus vīns nu golvonūs Latvejis pyutieju orkestru svātku “Skanēt savā laikā” organizatoru. Svātku koncertā, kas 30. majā nūtiks Bolvu piļsātys estradē, pīsadaleis 19 Vydzemis i Latgolys pyutieju orkestri i Bolvu nūvoda skotiviskuos dejis kolektivi. Vaira nakai 500 muziku lelais kūporkestris aplīcynuos pyutieju orkestra skaniejuma varoneibu i pryšumu, spielejūt latvīšu komponistu radeitū muzyku. Svātku koncerta programā vydā byus Raimonda Paula, Zigmara Liepiņa, Valda Zilvera, Eināra Lipska i Raita Rēriha skaņdorbi, kai i latvīšu i latgalīšu tautys dzīšmu apdaris. Pyutieju orkestri dirigēs – Jolands Andževs, Gvido Brenčevs, Olegs Kolesničenko, Aleksandrs Maslovs, Andris Muižnieks, Atvars Lakstīgala, Elmārs Rudzītis, Romāns Saikovskis, Egons Salmanis, Sergejs Sergejevs i Pēteris Vilks.