Rokstu sagataveja: portals lakuga.lv

Ar breineigi šmuku laiku ir īsastuojuse vosora, niu ir eistuo šaļts dūtīs uorā i baudeit tuos lobumus. Itūreiz īsacejumus ir sagatavejuse Rēzeknis nūvoda pošvaļdeibys sabīdryskūs attīceibu specialiste Katrīna Grietiņa, kura ir eistyna puorguojīņu i byušonys dobā fane.

Ejit puorguojīņūs!

Asmu lela puorguojīņu fane. Maņ pateik īt puorguojīņūs lelā kompanejā voi braukt pa maršrutu individuali. Vosora ir aktivuokais puorguojīņu laiks ari Latgolā. Ka gribi laist puorguojīnī kaidā kompanejā, tod sastdiņ, 13. junī, Leivuona pusē teik organizāts 18 km gars puorguojīņs. Ka vaicoj vīgluoku puorguojīni sovā tempā, tod vīns nu “Azaru stygys” (“Ezertakas”) maršruta pūsmu byus taišni laikā. Vysi pūsmi ir ārtai radzami Google Maps, i tūs var suokt voi beigt sevkurā šaļtī. Muni meiluokī puorguojīņu pūsmi ir gar Rāznys azaru, kur breineigys ainovys pasaver iz Latgolys jiuru.

Ceļojit pa Latgolu

Ka prosuos mīreiguokys aktivitatis, tok tymā pošā laikā gribīs ari mozu ci lelu pīdzeivuojumu, tod paleigā īt manakarte.lv. Tei pīduovoj gotovus maršrutus vysys Latvejis izzynuošonai i izpietei, i vairuoki nu tūs vad ari cauri Latgolai. Pa munam, maršruts “Tālo austrumu stāsts Ludzā” ir cīši interesants i skaists. Nūbraucūt apmāram 140 km, ir īspieja apsavērt vysaidys pērlis Felicianovā, Cyblā, Vacslobodā, Rundānūs, Pasīnē i cytuos vītuos. Itymā maršrutā ītylpst ari Plysūna azars i Plysūna (Plusuona) dyžakmiņs. Es raugu ite gasteit piec īspiejis bīžuok, bet munā kasdīnys ritmā tys nanūteik tik bīži, kai grybātūs.

Kur ir tiergs, tī ir rūseiba

Viļānu tiergs nūteik kotra mieneša ūtrajā svātdīnē, i gaidoms ari itamā nedeļā. Tys ir lobs veids, kai svātdiņ izbraukt atbaļsteit vītejūs sātys ražuotuoju, īsaguodojūt koč kū gordu voi praktisku. Itaidūs tiergūs var izzynuot, kaidi jaunī ražuotuoji i uzjiemieji ir tī drūsmeigī cylvāki, kas atteista sovu biznesu i pīduovoj jaunu produktu.