Rokstu sagataveja: portals lakuga.lv

Pavasarī izdūts i prezentāts dzīsminīka Aņša Ataola Bierzeņa ūtrais autordzīšmu albums “Dabasu trikmīņs”. Kai stuosta dzīsminīks, albumā salaseitys dzīsmis, kas īraksteitys nu 2016. da 2025. goda.

Albumu “Dabasu trikmīņs” sagatavejuse izdevnīceiba “Byumani”, i dubultajā albumā vydā ir 24 dzīsmis, kas īraksteitys desmit godu periodā nu 2016. da 2025. goda – laikā piec Aņša Ataola Bierzeņa debejis albuma “Pasaver” (2015) izīšonys. Albums “Pasaver” sovulaik sajēme Latgalīšu kulturys goda bolvu “Boņuks 2015” i 2017. godā ari dzīsminīku “Pāna bolvu”.

Kai albuma nūskaņu raksturoj pats dzīšmu autors, tod lela daļa dzīšmu “irā nūskumeigys, koč irā i nazcik prīceiguoku”. 17 nu vysu albuma dzīšmu ir īraksteitys latgaliski, puorejuos skaņ leitovīšu, krīvu, spāņu i latvīšu literarajā volūdā, bet dzīšmu īroksti taiseiti Reigā, Šauļūs, Minskā i Moskovā. Vīnā dzīsmē – “Vylkōju ciktoks” – eipaši izcalta Leivuona nūvoda Turku pogostam rakstureiguo Leivuona izlūksne, kas pīdar pi dziļūs sieliskūs izlūkšņu grupys. Kai Aņss nūsoka: “Gribieju pa vītejam!” “Dabasu trikmīnī” īkļautys dzīsmis, kas jau ari īprīšk publicātys kai videoklipi, par pīmāru, “Žuguris pereklis”, “Traputis su sviestu”, “Zīmys svātku nakts”.

Vysu albuma “Dabasu trikmīņs” dzīšmu vuordu i muzykys autors ir Aņss Ataols Bierzeņš, izjamūt dzīsmi “Zīmys svātku nakts”, kurys vuordim izmontuots Ontona Skryndys dzejūļs. Aņss soka, ka jam pošam vysa pyrma reizē atīt melodeja i pyrmais paņteņš. “Golvonais par reizi aizraksteit! A tod ūtrū i trešū paņteņu jau dadūmoj, dakonstruej,” skaidroj albuma dzīšmu autors. Skaņdorbu aranžeju autori ir pats Aņss, kai i Andris Šīrants i Valerejs Beļajevs.

Par jaunuo dubultuo albuma ideju portalam lakuga.lv Aņss Ataols Bierzeņš soka, ka itys asūt normals sūļs barda dzeivē. “Zynoms, ka tys prosa dorba i sasajimšonys, sasakoncentriešonys, bet puorīt laiks i dzīsmis sasalosa. Nu 2020. gods zynovu, ka varātu izlaist albuma, raudzeju meklēt finansiejuma, nasaguoja dabuot nikaida atbolsta i golā izdevu pats par sovu naudu,” stuosta Aņss. Ka albums byutu izdūts jau par reizi, tys nabyutu dubultais, bet pa itū laiku dzīšmu pīsalasejs tik daudzi, ka vīnā diskā vaira nasaleidušys.

Dubultuo albuma nūsaukums “Dabasu trikmīņs” ir aileite nu dzīsmis “Vacuo uobuļneica” teksta. “Normalai byutu pajimt nazkuru dzīsmi kai tytula dzīsmi. Tai saguoja ar pyrmū albumu “Pasaver”, bet ite vierūs iz dzīsmem i nivīnys nūsaukums nasaruodeja taids, kas atpasātu vysam albumam. Suoču skaiteit dzīšmu vuordus, i itei aileite izklauseja labi. Atpasēja vysa albuma nūskaņom,” albuma nūsaukuma stuostu skaidroj dzīsminīks.

Jaunū izdavumu digitali navar nūsaklauseit. Aņss nūsmej, ka tam asūts par slynku i reizē ari naatbolsta modeļa, ka kaids nazkur pasaulī peļnej nu tuo, ka cyts Latvejā klausuos muzykys. “Varbyut es pa vacam dūmoju, bet ari tikai digitalūs albumus naskaitu par eistynim. Ka vari īlikt plauktā – tod tei ir publikaceja!” smaidūt nūsoka albuma “Dabasu trikmīņs” autors, reizē precizejūt, ka dubultuo CD formatā albumu varēs nūpierkt kotrys grybātuojs.