Rokstu sagataveja: portals lakuga.lv

Ituo gods vosorā nu 2. juļa da 6. augusta Latgolā pyrmū reizi nūtiks storpdisciplinaruos kulturys iniciativys “Mājas mākslas dienas” pilotprojekts, kura organizatori meklej i aicynoj muokslinīkus i cytus rodūšūs nūzaru puorstuovus attaiseit sovys sātys, darbneicys i personeiguos telpys apmaklātuojim, viestej kulturys instituts “New East”.

Jaunuos iniciativys mierkis ir rūsynuot pasavērt iz muokslu na tik kai pabeigtu rezultatu, bet ari kai iz dzeivu, personisku i napuortraukti atteisteibā asūšu procesu. Projekta laikā muokslinīki, performeri, akteri, rakstnīki, dzejnīki, muziki, kolekcionari i cyti rodūšūs nūzaru puorstuovi varēs daleitīs ar sovu rodūšū pasauli – idejom, procesim, skicem, mieginuojumim, sarunom i dorbim, kas bīži palīk uorpus tradicionalūs izstuožu voi skotivis formatu rūbežim.

Organizatori pastreipoj, ka uzmaneibys centrā ir na tik pabeigti dorbi, bet ari mekliejumi, eksperimenti, napabeigteiba i poša rodūšuo procesa byušona kluotyn.

“Mājas mākslas dienas” īsadvasmuojušys nu kūpīnuos baļsteitim formatim, kurūs cylvāki attaisa sovys sātys, darbneicys, kab daleitūs ar personisku pīredzi. Kulturys kontekstā tys nūzeimoj vareibu radeit tīšu i uzticeibā baļsteitu sasatikšonu autoru, telpys i skateituoja vydā.

Projekta veiduotuoji skaita, ka muoksla dzymst na tik galerejuos i iz skotivis, bet ari kasdīniškuos vidēs – vyrtuvēs, garažuos, pogrobūs, pogolmūs i darbneicuos. Ituos telpys ar sovu viesturi, atmiņom i kasdīnys byušonu kluotyn teik par naatjamamu muokslinīcyskuos pīredzis daļu.

Daleiba projektā ir breivpruoteiga i, kai organizatori pastreipoj, nav vajadzeibys sagataveit eipašu izstuodi voi profesionali nūsleipātu performanci. Daleibnīki aicynuoti daleitīs ar sovu rodūšu procesu, idejom, atmosferu voi personeigu skotu iz sovu praksi. Formats var byut vysaids – skaitejumi, sarunys, atvārtī mieginuojumi, instalacejis, napabeigtu dorbu prezentacejis, skanis pīredzis, performancis, vakarenis, kolekceju demonstriejumi voi cytys rodūšuos iniciativys.

Itūšaļt teik veiduots pyrmais projekta dalinīku lūks, kurā eipaši aicynoj atsasaukt rodūšūs nūzaru puorstuovus nu Latgolys regiona, kur niu byušona kūpā, dialogs i kulturys byušona kluotyn ir eipaši nūzeimeiga kūpīnu styprynuošonai i sasaprasšonai sovā vydā. Interesi pīsadaleit pasuokumā da 19. juņa var izruodeit, aizpyldūt anketu ITE.