Rokstu sagataveja: portals lakuga.lv

Itūvosor pīcuos Latgolys regiona bazneicuos – Viļakā, Ludzā, Atašīnē, Izvoltā i Preiļūs – izskanēs jauns goreiguos muzykys cyklys “Latgolys sirds bolss”. Koncertu programa pīsavierš Latgolys sakralajai muzykai, latgalīšu volūdys byušonai kluotyn akademiskajā muzykā i komponistim, kurūs dorbūs goreigums nav tik tema, tok puorlīceiba i izalaseišona, viestej koncertu cykla organizatori.

Koncertprogramā īkļauti Romualda Jermaka, Riharda Dubrys, Andreja Selicka, Ontona Matvejāna, Mamerta Celminska, Renātis Stivrinis i Juoņa Ivanova skaņdorbi, kas sasavyn ar Edija Strušela rodūšū artavu aranžejuos i originalkompozicejuos.

Daļa nu programā īkļautūs skaņdorbu koncertdzeivē izskaņ reši, deļtam itys cyklys byus vareiba nu jauna sadzierdēt muzyku, kas cīši saistuos ar Latgolys goreigū i kulturviesturyskū telpu. Kai pastreipoj koncertu cykla organizatori, eipaša lūma itamā nūtikšonā ir latgalīšu volūdai – kas ir na viņ kai pīdareibys zeime, tok ari kai pylnvierteiga muokslinīcyskuos izteiksmis volūda.

Koncertu cyklys ir veļtejums komponistim, kuri par speiti vysam pīsaturiejuši pi sev nūzeimeigūs goreigūs vierteibu, taipat ari tys simboliski viestej par goreiguma nūzeimi Latgolys kūpejā viesturyskajā kontekstā.

“Cykla nūsaukums “Latgolys sirds bolss” ītver dūmu par bolsu, kas sakņojās Latgolys pīredzē, ticeibā, atmiņuos i cylvāka īškejā pasaulī – puordzeivuojumā. Tys nav skaļš bolss, dreižuok pīklusynuots, tok palīkūšs, nūtureigs – taids, kas atsabolsoj dzīsmēs, lyugšonuos, bazneicu veļvēs i cylvāku sirdīs,” doluos Edijs Strušels, kurs ir vīns nu koncerta cykla autoru.

Koncertūs muzicēs soprans Aija Jermoloviča, flautiste Daina Treimane i varganists Edijs Strušels. Vokala, flautys i vargaņu kombinaceja ļaun programai skanēt niansāti – šaļtim cīši personiski i apcereigi, šaļtim plotuok i pacyluotuok. Dīvnomu vide itai muzykai dūt eipašu telpu, kurā pasatvert nu kasdīnys steigys i klopotu, pīdzeivojūt sasatikšonu storp skaņu, vuordu i pīpiļdeitu klusumu.

Pyrmī koncerti gaidomi pavysam dreiži: 13. junī 19 stuņdēs Viļakys Romys katuoļu bazneicā i 28. junī 12 stuņdēs Ludzys Romys katuoļu bazneicā. Sovpus nuokušī koncerti byus Atašīnis Romys katuoļu bazneicā i Preiļu Romys katuoļu bazneicā, dreizumā byus zynomi precizi laiku i datumi. Iz koncertim aicynuots sevkurs, kuram itymā globali saspryngtajā laikā gribīs pīdzeivuot i ļautīs Latgolys goreiguos muzykys skaniejuma pīredzei.