Rokstu sagataveja: portals lakuga.lv

Latgolā vysod var atrast pīdzeivuojumus. Breineigi, ka pīdzeivuojumi var byut vysaidi – kai aktiva laivuošona pat vairuoku dīnu garumā, tai lobumu pošlaseišona, atpyuta malnajā piertī i vysaiduoki gordumi. Itūreiz īsacejumus sagatavejuse jaunīguojieja Latgolā ar diveju godu stažu kai Rēzeknis nūvoda dzeivuotuojai – Monta Vecuozuola (Vecozola).

Vīnys ci vairuoku dīnu laivuošonys pīdzeivuojums pa Dubnu

Kotru godu raugom namaineigā četru draudziņu kompanejā laistīs kaidā laivu braucīnī, i pādejais beja pa Dubnu. Skaista upe, vīglys diveju dīnu maršruts, vakariešona pi gunkura i krostūs daudzi gūvu. Saleidzynuojumā ar cytim braucīnim, itys atmiņā palics kai fiziski vīglys i ar daudzim civilizacejis asameibys kluotyn elementim – breineigs laivuošonys īsuociejim ci kūpā ar bārnim. Kanoe laivu, inventara nūmu i padūmus plānuošonā var dabuot ITE.

Zemiņu pošlaseišona “Latgales zemenēs” Rēzeknis nūvoda Drycānūs

Izcyla aktivitate ar kaidu seņ nasatyktu draugu ci mamu. Piec tam obligatuo zapts vuoreišona, ir tok pādejais laiks! Pi mane gasteja Dana, i, dyži nikuo naplānojūt, īrūsynuoju nūbraukt iz zemiņu pošlaseišonu. Tys beidzēs ar 37 kg zemiņu i septenim veidim, kai tuos apēst. Vysus nauzskaiteišu, tok sylti īsoku izvuoreit zapti ar vanilis puoksti (2 kg ūgu, 500 g zapts cukra i vīna vasala īgrīzta vanilis puoksts) – pa munam, lobuoku zapti es nikod naasu izvuorejuse. Topa ūtrajā vītā – zemiņu dabasu manna.

Malnuos pierts rituals

Vosorys malnuos pierts rituals ar Ingūnu – lai ari pierts redzīs kai naatjamama zīmys sastuovdaļa, ari vosorā tai ir sova mageja. Ingūna saiminīkoj cīši skaistā vītā kūpā ar zyrgim, ponejim, kozom, sunim i kačim. Dīnā, kod es tī gasteju, beja pīdzims poneju bierneņš, kuru nūsauce par Paisumu. Breineiga vīta kasdīnys skriejīņa nūpauziešonai.

Kopejs i kruasans ar lasi Preiļu gastrobusā

Preiļu gastrobuss ir interesanta vīta kai eisai pauzei, tai randeņam. Latgolā dzeivoju saleidzynūši naseņ i vys vēļ ir daudzi kuo jauna. Vysod prīcojūs sajimt kaidu īsacejumu voi aicynuojumu nazkū apmeklēt. Vīnā reizē Jūlija uzaicynuoja iz kopeju i kruasanu Preiļu gastrobusā. Itei vīta atsataisejuse jau pyrma kaida laiceņa, tok kluseņom nūsaglobuojuse kaidā īškpogolmā Preiļu centrā. Tī saiminīkoj Olga ar cīši skaneigim smīklim i kotru dīnu cap svaigus kruasanus ar vysvysaidim piļdejumim.