Rokstu sagataveja: portals lakuga.lv

Kulturys īsacejumus itai nedeļai sagatavejuse Ludzys nūvoda Saļņovys pogosta kulturys pasuokumu organizātuoja Valentīna Kirsanova. Jei vysus aicynoj 24. i 25. julī apmeklēt Reitupis svātkus Kuorsovā – diveju dīnu svineibys ar koncertim, amatnīku tierdzeņu, aktivitatem saimem, sporta pasuokumim i svātku balli leidz pat reitam.

Izstuodis “Mantojums” atkluošona

Pīktdīnis vokorā svātki aizasuoks ar tekstildorbu izstuodis “Mantojums” atkluošonu Kuorsovys kulturviesturis centrā “Līču mājas”. Tei byus breineiga vareiba īpazeit vītejū kulturys montuojumu i suokt svātku nedeļgolu mīrpylnā jutūnē.

Daudzveideiga koncertprograma sastdīnis vokorā

Sastdiņ iz Reitupis svātku skotivis gaidoma muzykali boguota programa – uzastuos Roberto Meloni i Rodrigo Manfrinati, Diona Liepiņa kūpā ar Rēzeknis oranžū kori, kai ari skanēs kapelu koncerts i cyti svātku prīšknasumi.

“Opus Pro” koncerts i balle da reita

Svātku kulminaceja byus legendaruos grupys “Opus Pro” koncerts, kam sekuos īspaideiga uguņuošona i balle kūpā ar grupu “Zvaigžņu akords”. Breineigs nūslāgums vosorys svātkim ar dzīsmem, dejom i kūpā byušonys prīcu.