Kulturys īsacejumi nedeļai: piļsātys svātki, buļbu blīni i Rāznys azara leidaka

Fotokolaža nu publicitatis i sātyslopys receptes.lv karteņu

Temys: Baritoni, buļbu blīni, Ingars Puncuļs, kulturys īsacejumi, kulturys īsacejumi nedeļai, Rāzna, Rāznys azars, Rēzekne, Rēzeknis svātki

Rokstu sagataveja: portals lakuga.lv

Itūnedeļ kulturys īsacejumus sagataveja dzīduotuojs i grupys “Baritoni” dalinīks Ingars Puncuļs. Jis īsoka apmeklēt sovys dzymtuos piļsātys Rēzeknis piļsātys svātkus, izcept buļbu blīnus i nūgiut leidaku Rāznys azarā.

Rēzeknis piļsātys svātki

Itamā nedeļā vairuoku dīnu garumā, nu 31. juļa da 2. augusta, Rēzekne svietej sovu 741. dzimšonys dīnu. Svātku laikā īkļautys vysaidys nūtikšonys – koncerti, rodūšuos darbneicys, sporta saceņseibys i cyti pasuokumi.

*Karteņā: Rēzeknis piļsātys svātku 1. augusta programa*

Buļbu blīni ar dobys veļtem

Mežūs jau pamozam pasaruoda vysaidys sieņs, bet duorzūs – ogūrči. Kab lyktu lītā ituos veļtis, juopagatavej kas gords. Maņ cīši garšoj buļbu blīni ar gailiņu mierci i kiupynuotu gaļu, kurus pasnīdz ar mozsuoleitim ogūrčim. Īsoku tūs pagataveit!

*Karteņā: buļbu blīni, foto nu receptes.lv*

Zivs nu Latgolys jiurys

Latgolai ir sova jiura – Rāznys azars. Pi azara var ni tikai baudeit ainovu i mauduošonūs, bet ari nūgiut kaidu zivi. Muns īsacejums – nūgiut Rāznys azarā leidaku. Tikai ir svareigi zvejuošonā i makšariešonā īvāruot vysus nūteiktūs īrūbežuojumus i nūsacejumus!