Rokstu sagataveja: portals lakuga.lv

Itūgod nu 31. juļa da 2. augusta jau pīktū reizi Augšdaugovys nūvoda Ambeļu tradiceju sātā “Skreine” nūtiks breivuos dobys lūmu spēle-nūmetne “Pi Ombomīšim!”, kas apvīnoj tradicionalū muziciešonu, omotu prasmis i rauga īdzeivynuot 19. godu symtu pavysam tyvā i saprūtamā veidā, viestej nūtikšonys reikuotuoji.

Nūmetni ar Vaļsts kulturkapitala fonda atspaidu organizej folklorys kūpa “Speiga”, kurys sastuovā puorsvarā ir jaunīši nu 12 da 24 godu. Caur nūmetni “Speiga” rauga uzrunuot cytus jaunīšus Latvejā, kurūs aizraun vysaidi 19. godu simta sadzeivis aspekti – voi tei byutu muzyka, apgierbs, rūkdorbi voi kas cyts – i pīduovuot vidi, kurā byut tyvuokim laikmatam, kū apdzīžam tautys dzīsmēs, bet nadabojam pīdzeivuot.

“Mums tei ir vareiba vīnu reizi godā pa eistam pīdzeivuot tū, par kū dzīžam dzīsmes, byut vidē, kur tautystārps nav kostims, bet kasdīnys apgierbs, i raudzeit īdzeivynuot spontanu muziciešonu, pavodūt laiku breineigā, atjaunuotā 19. godu symta sātā,” stuosta nūmetnis dalineica i vīna nu organizatoru Jadviga Mežniece.

Itūgod nūmetnis stuosta centrā ir saduzušī trauki – Ombomīšu saimis puiši, pavierseigai struodojūt, apguozuši vasalu trauku kolnu! Paleigā tiks saukta pūdneica Evija Maļkeviča-Grundele, kas saimei i gostim īruodeis, kai sataiseit jaunys kruškys i škeivus. Taipat byus vareiba vuiceitīs, kai kapceit izkapti i pļaut zuoli, taiseit bārza tuoss cibenis i spēlēt vysaidus instrumentus, tymā vydā ari kūklis.

Nūmetnei vaira dasasaceit navar, tok 1. augusta vokorā 19 stuņdēs Ambeļu tradiceju sātā “Skreine” tuos dalinīki taiseis atvārtū večerinku, kurū apmeklēt aicinuoti vysi, kam ļuste iz kaidu daņci voi kadriļu.

Kai stuosta organizatori, nūtikšonys mierkis nav rekonstruēt senejūs laikus, bet radeit iluzeju i īsajust gaisūtnē caur atbylstūšim apgierba siluetim, kasdīneigim aizdavumim, senejom dzīsmem i maksimali nalītojūt 21. godu symta aksesuarus. Eisumā – dalinīki izdūmoj sev pīmāruotu i laikmatam atbylstūšu lūmu, kurū nūmetnis laikā gribēs izspēlēt Latgolys lauku sātā 19./20. godu symta mejā. Nūmetnis “Pi Ombomīšim!” jutūni labi var nūjaust video atsavieršonā nu 2024. gods nūmetnis.