Rokstu sagataveja: portals lakuga.lv

Itei nedeļa ir laiks, kod na tik Latgolā, tok vysā Latvejā i vēļ plotuok sasateik goreigais ar laiceigū, kam nu 11. da 15. augusta Aglyunys bazilikā byus Vysusvātuokuos Jaunovys Marijis Dabasūs uzjimšonys svātki i Aglyunā otkon sasapuļcēs tyukstūšom ļaužu. Aglyuna ir ari vīns nu ituos nedelis kulturys īsacejumu, kurus pīduovoj muziks i grupys “Dabasu Durovys” liders Arņs Slobožanins.

Svātki Aglyunā

Pyrmais i uorpus vysys konkurencis īsacejums nūteikti ir svātki Aglyunā (programa ITE). Itei nūtikšona ir daļa nu latgalīša identitatis. Tys Latgolu i latgalīšus atškir nu puorejuos Latvejis. Koč ari niu ticeigūs skaits ir guojs mozumā, katuoļticeiba i tuos tradicejis vystik vēļ ir spieceigys. Aglyunys svātku laikā ir pasuokumi jaunīšim, taipoš ari koč kas smoguoks kai Krysta ceļš, pa munam, kotram tys byutu juoizdora i juoizbauda. Pīmiņu, ka munā bierneibā tei beja vosorys nūtikšona nr. 1, kod vysi brauce iz tīni kai iz taidu rokfestivalu myusu dīnuos. Taipoš, kū vacuoks palīku, tū vaira saprūtu, cik tys vystik ir svareigi.

Folklorys kūpa “Upīte” Leigatnē

21. augustā folklorys kūpys “Upīte” koncerts Leigatnē, kulturvītā “Zeit”. Itei byus breineiga nūtikšona, kuru eistyn vārts apmeklēt. Poša folklorys kūpa ir kai lela saime, deļtam tycu, ka ari koncerts byus giminiskys i sirsneigs. Beletus var īsaguoduot ITE.

Svaiga muzyka i nūtikšonys latgaliski

Tikū izguojuse jauna dzīsme latgaliski “Pikachu”, kuru nūteikti ir vārts nūsaklauseit, tī kūpā sasateik Daiga Barkāne ci Ūga i apvīneiba “Juos īluos līluos”. Pi ituo izmontuošu vareibu pastuosteit, ka grupa “Dabasu Durovys” i apvīneiba “Juos īluos līluos” gatavejās muzykalai izruodei “Blondais mūceklis”, kur kūpā koč kū sadzīduosim. Tys byus interesants muzykals savīnuojums, kuru pat gryuši nūraksturuot – hiphops i taida kai alternativuo popmuzyka. Beleti atrūnami ITE.