Rokstu sagataveja: portals lakuga.lv

Dace Tihovska ir atpazeistama na viņ folklorā i muzykā kai dzīdūšuos Tihovsku saimis mama, tok ari pedagogis dorbā. Jei ir suokumškolys školuotuoja Ludzys Muzykys pamatškolā, par izcylu dorbu i īguļdejumu latgalīšu volūdys i kulturys īdzeivynuošonā školā ir sajāmuse ari Nikodema Rancāna bolvu. Paraleli sirds dorbam školā Dace šaļtim roksta dzeju i prozu, kai ari turpynoj muzicēt. Itymā nedeļgolā Daci ar meitu i cytim muzikim nu Latgolys varēs satikt koncertā Ruojā, partū īsacejumus vaicojam taišni jai. Dace nedeļu īsoka pavadeit muzykali i atsapyust iz iudiņa.

“LNSO Vasarnīca”

Latgolys viestnīceiba “Gors” ir muna favoritvīta pasuokumu apmekliešonai. Partū pyrmais īsacejums ir apmeklēt Latvejis Nacionaluo simfoniskuo orkestra muzykys festivalu “LNSO Vasarnīca”. Itūgod daīmama boguoteiga programa saimem i draugim. Vaira informacejis i beletus iz koncertim meklej ITE.

Koncerts “No Latgales ar mīlestību”

Dzīžūt ar saimi koncertūs vysā Latvejā, beja eistyn lela prīca satikt cīši daudz latgalīšu muzykys mīļuotuoju. Deļtuo aicynoju iz koncertim “No Latgales ar mīlestību” 28. augustā Ruojā i 30. augustā Līpuojā. Pasuokumā klauseituojus prīcynuos dzīduotuoji, kuru saknis meklejamys Latgolā. 28. augusta koncertā iz skotivis varēs satikt ari mani i munu meitu Laimu Tihovsku. Beletus iz pasuokumu var atrast ITE.

Sadraudzeiba iz Zviergzdinis azara

Plūsts iz Zviergzdinis azara Ludzys nūvodā ir loba vīta vysaidom nūtikšonom. Cīši vierteigi ite byutu atbraukt, jaunū vuiceibu godu suocūt. Pasnīdzieji i audziekni ite var reikuot sasapazeišonys voi sadraudzeibys pasuokumus, kolektivi var reikuot izbraukuma seminarus, sasatikšonys i cytus pasuokumus. Vaira informacejis: atputaludza.lv