Rokstu sagataveja: portals lakuga.lv

Rēzeknis Centraluo biblioteka turpynoj lekceju cyklu “Latgaliešu grāmatniecības pēdas”. 15. septembrī 13 stuņdēs gaidoma literaturzynuotnīka, rakstnīka i nūvodpietnīka Valentina Lukaševiča lekceja par latgalīšu literaturu 20. godu symtā, informej bibliotekys puorstuovi.

Lekcejā Valentins Lukaševičs viesteis par nūzeimeiguokajim pagrīzīņa punktim 20. godu symta gaitā Latgolys literaturys ainovā, kai ari par spūdruokajim autorim, kuri raksturoj itūs periodus i puormejis.

Pasuokumu boguotynuos bibliotekys sagataveituo pavodūšuo izstuode “Latgaliešu literatūras ainava 20. gadsimtā”, kurā byus apsaverami 20. godu symta latgalīšu literarī dorbi nu bibliotekys kruojuma i nūvodpietnīceibys materiali saisteibā ar izdeviejim i izdeviejdarbeibu, kai ari gruomatnīceibu i spūdruokajom personeibom itymā periodā.

Valentins Lukaševičs ir dzejnīks, literaturzynuotnīks, rakstnīks, scenareju autors i nūvodpietnīks. Jis ir pyrmūs latgalīšu postmodernūs romanu “Seppuku iz saulis vādara” (1995) i “Valerjana dzeive i redzīni” (1996) leidzautors, izdevs dzejis tetralogeju “Ceļš” (2005–2020), rokstu autors laikroksta “Latgales Laiks” rokstu cyklam “Latgalīšu Gazeta” i žurnalam “A12”. Juo eseju kruojums “Casnāgu maizeitis” (2022) sajiems Latgalīšu kulturys goda bolvu “Boņuks 2022”. Autoram vysod patics stuosteit par cylvākim i vītom, kurys nav plotai tiražātys, tuos atspīgeļuotys ari gruomotā “Dīnvydlatgolys stuosti” (2024). Nūvodpietnīka i izzynuotuoja doba breineigi atsakluoja ari Valentina vadeitajā LTV1 raidejumā “Cytaidi latviskais”. Itūgod gaidoma Valentina Lukaševiča gruomotys “Latgalīšu literati. Mozs īsavierīņs” izīšona, ar stuostim par latgalīšu literatim jis kotru mienesi īpazeistynoj ari portala lakuga.lv skaiteituojus.

Lekceju cyklā “Latgaliešu grāmatniecības pēdas” jau aizvadeita profesoris, filologejis doktoris Lidejis Leikumys lekceja par 18.–19. godu symta latgalīšu raksteibu i gruomatnīceibu, skaidrojūt pūliskuos raksteibys sovpateibys, volūdys atteisteibu i nūzeimeiguokūs dorbus. Sovutīs oktobrī Rēzeknis Centralajā bibliotekā gaidoma trešuo i nūslādzūšuo lekceja par latgalīšu literaturu 21. godu symtā.

Īīšona pasuokumā bez moksys. Tuo nūtikšona tiks fotografāta i fiļmāta. Lekceju cyklys teik realizāts ar Vaļsts kulturkapitala fonda mierkprogramys “Latvīšu viesturyskūs zemu atteisteibys programa” i bīdreibys “Latgales reģiona attīstības aģentūra” paleigu.