Rokstu sagataveja: portals lakuga.lv

Jau sastū godu piec kuortys izīt plānuotuojs “Giut breidi”, tok pīktū reizi tymā byus vareiba plānuot dorbus iz prīšku ari latgaliski, kam paguojušuo gods plānuotuojs beja latvīšu literarajā volūdā. Vys vēļ “Giut breidi” ir vīneigais taida veida izdavums latgaliski, bet par tū, voi ari cytugod varēsim gaideit tuo izīšonu, autoris nav puorlīcynuotys. Naseņ izsludynuota 2027. gods plānuotuoja īprīškpuordūšona. Vaicuojom autorem, ar kaidim jaunumim tys atīt.

Pyrmū reizi latgaliskais plānuotuojs “Giut breidi” izguoja 2021. godā, tuo idejis autore namaineigi ir Līga Springa, grafiskuo dizainere – Liāna Merņaka. Jom ar laiku pīsavīnuoja foto autore, kas ir ari portala lakuga.lv vadeituoja, Amanda Anusāne. Tok itūgod jei nav vīneiguo, kurys fotografejis varēs redzēt plānuotuojā, jai guojušys tolkā ari fotografis Natālija Brokāne i Kristīna Čimbaraite.

Itūgod plānuotuojs “Giut breidi” atsagrīž latgalīšu volūdā, i pīduovoj īdrusynuojumu – SUOKYS. “Lai kas ari tys byutu – jauns dorbs, aizaraušona voi dzeive jaunā piļsātā – suokums kotram nu myusu var byut vysaids. Taišni partū ir svareigi īsadreikstēt i spert sūli, kas vad nazynomajā. Īspiejams, taišni nazynomais myus bīdynoj vysuvaira, tok taišni partū mes jius aicynojam suokt,” ar itaidim īdvesmis vuordim Līga Springa pīsoka 2027. gods plānuotuoju. Tū var apsavērt i īprīškpuordūšonā nūpierkt sātyslopā giutbreidi.lv.

Itūgod plānuotuojam daškierts cyts raksturs. Tuo dizainā haoss mejās ar sakuortuoteibu. Rūts i izkluojums roda kuorteibu, tok teksti, fotografejis i grafiskī elementi īnas vaira dzeiveibys i haosa. “Vīns nu ituo gods grafiskūs elementu ir spiralveida zeimiejumi, kas sūpluok fotografejom pasaruoda puslopuos. Jī rodušīs nu dūmys par tū, kai mes reizem, nazkū dūmojūt, klausūtīs voi runojūt, suocam zeimuot linejis voi keburus. Reizem taišni tai ari suocās idejis – mes nazkū dūmojam i skicejam, vēļ eisti nazynūt, kur tys aizvess. Itī elementi maņ simbolizej taidu kai dūmu plyudumu, ideju rasšonūs i pošu suokumu,” par plānuotuoja dizainu stuosta Liāna Merņaka.

“Ari plānuotuoja vuoki i kūpejais vizualais tāls itūreiz nav tik romantiskys. Tymūs pasaruoda vaira spāka i rakstura. Taida izīšona uorpus īrostuo, uorpus ramu, i īsadreikstiešona byut drupeit cytaižuokam. Plānuotuojā dzaltonī i zylī tūni kūpā ar malnboltajom fotografejom pastyprynoj kontrastus i akcentus. Tys vyss veidoj plānuotuoja raksturu, kurā reizē ir kai maigums, tai spāks. Maņ redzīs, ka ituo gods plānuotuojs ir taišni taids – maigs, tok styprys. Taids, kas īsadreikst nasabeit suokt i izavērt drupeit napareizs,” pastreipoj dizainere Liāna.

Komanda ir nūsaskaņuojuse, ka itys varātu byut pādejais plānuotuoja izīšonys gods i grib saceit paļdis vysim atbaļsteituojim i juo lītuotuojim. “Plānuotuoja stuosts i “Giut breidi” komandys ceļš ir bejs vysaidu nūtikšonu i emoceju pīpiļdeits. Tok taišni ar itū plānuotuoju mes gribim pasceit, ka nūslādzam sovu 2021. godā aizsuoktū stuostu. Itys ir pādejais gods, kod mums ir vareiba radeit produktu, kas kasdīnā byus kūpā ar jums. Radeit plānuotuoju, kurā jius pīrakstejot sovus plānus, atzeimuojot svareigys nūtikšonys, veiduojot atminis i svietejot kasdīnu. “Giut breidi” komanda izsoka miļzeigu pateiceibu sevkuram i syuta sirsneigus apskuovīņus. Paļdis, ka bejot daļa nu myusu stuosta! Lai ari itys stuosts nūsaslādz, mes ticim, ka kotrys beigys ir ari nazkuo jauna suokys. Kam taišni itūgod mes izalosom suokt nu suokuma,” tai plānuotuoja autore Līga Springa.