Rokstu sagataveja: portals lakuga.lv

18. junī nūsaukti 2025./2026. gods sezonys “Spēlmaņu nakts” nominanti 17 kategorejuos. Kategorejā “Goda aktrise” nomināta ari Daugovpiļs teatra aktrise Jūlija Ļaha par titullūmu sengreku tragedejis īstudiejumā “Hekube” latgalīšu volūdā.

“Spēlmaņu nakts” žurejis komisejā sastuovā ir deveni nūzaris profesionali, kas nu 2025. gods 1. augusta da 2026. gods 15. juņa nūsavēre i izviertēja 108 profesionaluo teatra jaunīstudiejumus. Ituo gods 23. novembrī “Spēlmaņu nakts” ceremoneja nūtiks jau 33. reizi.

Pi vysuvaira – 19 nominaceju – tics Latvejis Nacionalais teatris, sovutīs Dailis teatris sajiems 18 nominacejis, bet Līpuojis i Valmīrys teatri – 14 nominacejis kotrys. Daugovpiļs teatram vīneigū nominaceju nūpeļnejuse aktrise Jūlija Ļaha, kura īsajutuos golvonuos varūnis lūmā sengreku tragedejis “Hekube” īstudiejumā, kas pyrmizruodi pīdzeivuoja pārnejuo gods novembra vydā. Izruodis režisore ir Tatjana Stepančenko-Bogdana nu Fraņcejis, dramatiziejumu latgaliski veiduojuse Kristīne Veinšteina.

Jūlija Ļaha kategorejā “Goda aktrise” konkurej ar Agnesi Jēkabsoni nu Līpuojis teatra (nomināta par Lienis lūmu izruodē “Trīs bēres un divas kāzas”), Ilzi Ķuzuli-Skrastiņu nu Dailis teatra (nomināta par Dominikys Frankonys lūmu izruodē “Pirmavots”), Māru Menniku nu Valmīrys teatra (nomināta par muosys Aloizijis Bovjērys lūmu izruodē “Šaubas”) i Lauru Siliņu nu Latvejis Nacionaluo teatra (nomināta par Aijis lūmu izruodē “Atbalss Aija”).

Kai goda režisors nomināts ari Latgolys kulturā labi zynomais Vīsturs Kairišs, kura izruode “Pirmavots” tykuse pi ostoņu nominaceju. Vīna nu tūs ari vēļ vīnam latgalīšam – Juram Vaivodam –, kurs pīzeits par vīnu nu ituos sezonys lobuokūs jaundorba muzykā voi muzykaluo nūformiejuma radeituoju. Kai goda gaismu muokslineica ari itūgod izvierzeita Upītis kulturtelpys puorstuove Lienīte Slišāne nu Latvejis Nacionaluo teatra par dorbu izruodē “Atbalss Aija”. Nūsaceitu nominaceju sajiems ari Rēzeknis teatris “Joriks” – goda jaunuo skotivis muokslinīka kategorejā izvierzeita ari Elīna Bartkeviča par lūmu izruodē “Konemāras galvaskauss”. Bartkeviča ir Mihaila Čehova Reigys Krīvu teatra aktrise, tok itei izruode ir Rēzeknis teatra režisora Edvīna Klimanova diplomdorbs Latvejis Kulturys akademejā. “Joriks” itū īstudiejumu pajiems sovā paspuornē, tok leluokuo daļa tuos izruožu nūtykuse Reigā, na Rēzeknē.

Ar pylnu nominantu sarokstu var īpasazeit ITE.

Žurejis komisejā struoduoja: Atis Rozentāls, žurejis komisejis prīšksādātuojs, teatra kritiks, laikroksta “Diena” žurnalists; Ingrīda Vilkārse, žurejis prīšksādātuoja vītneica, teatra kritike i zynuotneica; Zane Radzuobe (Radzobe), teatra kritike i zynuotneica, Latvejis Universitatis (LU) docente i Latvejis Kulturys akademejis pietneica; Jānis Siliņš, Latvejis Kulturys akademejis profesors, Eduarda Smiļģa Teatra muzeja vadeituojs i teatra viesturnīks; Kitija Balcare, teatra kritike, LU Literaturys, folklorys i muokslys instituta pietneica; Ilze Kļaviņa, teatra kritike i teatra pietneica; Sandra Krastiņa, muokslineica; Ugis (Uģis) Segliņš, psihodramys specialists; Armands Znuotiņš (Znotiņš), muzykys kritiks.