Rokstu sagataveja: portals lakuga.lv

Dzīsmineica Laura Bicāne sasprīduse klauseituojim atguodynuot par dzīsmi “Freakin’ Out”, ar kurū 2012. godā pīsadaleja Eirovizejis nacionalajā atlasē. Vīnā skaņdorbā, kas remiksāts disko rytmūs, sasavyn kai tuos angliskuo, tai latgaliskuo verseja (“Es tikai ļaujūs”), tymā pīsadola ari gosts – grupys “Borowa Mc” liders Aigars Runčis.

Tuolajā 2012. godā dzīsmineica Laura Bicāne kūpā ar Romānu Sladzi, kai ari grupu “Dabasu Durovys” pīsadaleja Eirovizejis dzīšmu konkursa nacionalajā atlasē. Laura viestej, ka itei dzīsme jai ir eipaša. Originalā tei saraksteita latgaliski i zynoma ar nūsaukumu “Es tikai ļaujūs”. Niu sadarbeibā ar pūļu producentu Lukašu Sabčuku tyka radeits dzīsmis remikss vasareigūs, jautrūs disko rytmūs.

Jaunuo verseja īkļaun kai dzīsmis tekstu angliski, tai latgaliski. Puorsteiguma momentu klauseituojim saguoduojs pazeistamais grupys “Borowa Mc” solists Aigars Runčis. Dzīsmi var na tik klauseitīs, tok ari vērtīs tuos videoklipu. 2025. gods rudinī tys radeits iz daudzstuovu autonūvītnis Rozenheimys piļsātā, Vuocejā. Doncuotuoji ir nu tuos pošys piļsātys deju školys “mkmARTable”, vadeituojs Maksimilians Adekunle Jaunmaiers. Kamerys operators – Klaudiu Manea.

Dzīduotuoja Laura Bicāne (niu eistajā vuordā Laura Gutjeresa-Kamačo) jau vairuokus godus dzeivoj Vuocejā, vystik turpynoj nūsadorbuot ar muzyku, tymā skaitā dzīd i sacer dzīsmis latgaliski. Vaira par Laurys dzeivi var izzynuot portala lakuga.lv intervejā ar jū ITE. Laura tur nūceju, ka ar itū dzīsmi ir izadevs koč nadaudz atdzeivynuot “Eirodzīsmis 2012” spūdrumu i nūvielej vysim breineigu vosoru.