Roksta autore: Laura Spundere, portals lakuga.lv

Juosoka, ka viersroksts ir vysā puorspeilāts, ar atsauci iz vysaida veida supervarūnim. Vys ir tik interesanti, cik daudzveideigys i aizraunūšys ir apleicejūs ļaužu papyldu dorbuošonuos i interešu sferys. Vitys Šmaukstelis pamata dorbs eistyn ir saisteits ar klientu apkolpuošonys sferu, cikom profesionali jei ir vuicejusēs par restauratori. Pa munam, ari Vitu dīzgon drūsai var īskaiteit supervarūņu rynduos, kam ar juos prašmu paleidzeibu nu pagaisšonys teik gluobts myusu kulturviesturyskais montuojums – ikonys.

Vita Šmaukstele īt nu Preiļu pusis, tī jei vuicejuos i pabeidze Juoņa Eglīša Preiļu Vaļsts gimnazeju. Piečuok Latvejis Muokslys akademejis Rēzeknis filialē suoce studēt muokslu, sovpus studejis turpynuoja Latvejis Muokslys akademejā Reigā. Niu jau vairuoku godu garumā Vita sovā darbneicā Rēzeknē restaurej senejis ikonys. Vysubīžuok tuos ir pareizticeigūs i vacticeibnīku ikonys, kam taišni itim religiskajim vierzīnim ikonys ir vīns nu izplateituokūs muokslys dorbu veidu. Kai stuosta poša restauratore, senejuokuo ikona, kuru jei ir restauriejuse, varātu byut nu 17. godu symta beigu.

Deļ najaušeibys teik par restauratori

“Mes, restauratori, asam dīzgon pīticeigi, eipaši nasareklamejam. Nav jau ari nikaidys specifiskys platformys, kur sevi reklamēt. Tok pa mozam gribīs nadaudz popularizēt i paruodeit sovu omotu i dorba specifiku caur Instagram. Vystik jauni klienti mani vysubīžuok atrūn piec cytu klientu īsacejumu.

Muokslys školā es suoču īt, tikai asūt gimnazejā, kas nav parosta prakse, bīžuok iz muokslys školu suoc īt jaunuokā vacumā. Lai ari drupeit nūvāluotai, tok saprotu, ka tys maņ pateik i pasadūd. Absolvejūt muokslys školu, turpynuoju sovu ceļu i suoču vuiceitīs gleznīceibu Latvejis Muokslys akademejis filialē Rēzeknē. Tok, lai ari gleznuot maņ pateik, saprotu, ka tys nav eisti muns vierzīņs. Vīnu šaļti pat beja lyuzuma punkts, kod dūmuoju, ka varbyut studejis juomat molā. Tok, pasasokūt pedagogim, tūlaik vystik pabeidžu pyrmū kursu. Piečuok filialē pasaruodeja restauracejis programa. Paraudzeju, saprotu, ka maņ pateik, i veiksmeigai puorsaorientieju itymā vierzīnī. Restauraceja mani aizraun vairuok nakai gleznīceiba, kam tī kluot īt izpiete, vysaiduoki procesi, mozuok taišni rodūšuma, dreižuok zynuotnyska pīīšona dorbam. Es asu raudzejuse restaurēt ari gleznys, tok ikonys mani aizraun vaira.

Muns pasnīdziejs Rēzeknē beja Jakovs Kļosovs, jis beja cīši lobs ikonu restaurātuojs. Latgolys filiale ar nūdūmu veiduoja specialistus taišni itymā vierzīnī, kam regionā ir cīši plots vacticeibnīku i pareizticeigūs montuojums. Vuicūtīs suokumā beja lekceju process, tok pamozam mums tyka dūta īspieja ari kopēt ikonys, veikt vīnkuoršuokus procesus, par pīmāru, teireišonu. Pyrms dorba suokšonys, vuicejomēs, ka vajag veikt izpieti, izveiduot dorba restauracejis programu. Itū profeseju var īsavuiceit tikai caur praksi. Prūtams, koč kaida teoreja i izpratne ir vajadzeiga, tok bez praksis nikas taipoš nasaīs. Restauratoram ir svareigi byut pacīteigam, juospiej ilgstūši koncentrētīs i dorbuotīs skrupulozi. Vysam puori ir taišni pacīteiba, spieja vīnam objektam veļteit daudz laika.”

Kotra ikona ir individuala

“Eistyn navar pasaceit, cik ilgi ir juorestaurej vīna ikona. Kotrys pasyutejums ir cīši atškireigs na tik izmāra ziņā, tok ari sasaglobuošonys stuovūklī. Ir bejušys taidys ikonys, kur juorestaurej pavysam nadaudz, un ir ari taidys, kurom juoveļtej cīši daudz laika. Atsaškir ikonys lakys veids, tuos bīzums, nūjimšonys ilgums. Par pīmāru, ir slovons ikonu gleznuotuojs Gavriils Frolovs, kurs ir dzeivuojs ari Rēzeknē. Jis ir atstuojs plotu montuojumu Rēzeknis vacticeibnīku draudzei, taipoš ari vairuokys privatpersonys ir sovā eipašumā īsaguoduojušys juo dorbus. Juo ikonys ir veiduotys eipašā tehnologejā, i tūs restauraceja prosa laiku.

Vysubīžuok kasdīnā munā darbneicā paraleli teik restaurātys vairuokys ikonys – vīna teik nūstyprynuota, cikom cytai atjaunuots tūniejums. Privatpersonom ikonys parosti ir vysā lobā stuovūklī, nav puorgleznuotys i nav nikaidu “zamiudiņa akmiņu”. Tok ir ari taidys, kuru izpietei ir juoveļtej ilguoks laiks, kod dorbs nateik dareits vīgli i automatiski, tok lieneišom, kotru procesa daļu pietejūt zam lampys. Deļtam eistyn navar pat videji pasaceit, cik ilgu laiku aizjam ikonys restauriešona, nu sevkurā gadīnī – suocūt nu vīna mieneša.”

Restaurators kai pietnīks

“Restauratoram ir svareigi zynuot i atpazeit ikonu gleznuošonys tehnologejis, saprast, kaidi materiali izmontuoti, gipša voi kreita gruņts, kaidi pigmenti i tt. Sajamūt ikonu, es nu suokuma veicu izpieti, apsaveru, kū varu atrast par tuos viesturi. Obligati sataisu ari suokuma foto fiksaceju. Ka klients grib, ari sagataveju restauracejis programu. Ikonu izpieteju UV storūs, pavysam mozu gabaleņu ari pateireju, kab saprostu, ar kū maņ byus dareišona. Ir ari bejs gadejums, kod nešu ikonu iz rentgenu.

Restauratora dorba etika naļaun īsajaukt pošā dorbā. Mes tūnejam i atgrīžam tikai tū, kas ir zuds. Cyti klienti grib atjaunuot vysu zudušū, cyti – tikai nūstyprynuot ikonu. Puorzeimiešona i puorgleznuošona nav eisti pīļaunama. Prūtams, lyugumi bejuši vysaidi, tok es vysleidz raugu atrast balansu. Ari klientam juosaprūt, ka tys senejais nikod vaira nabyus kai jauns.

Goduos, ka klients grib puorzeļteit dorbu, lai ir jauns i spūdrys, tok muns aizdavums itymā gadīnī ir izdareit tai, lai atjaunuotais zalts naizaver pavysam jauns, kab ikonys kūpskots sasaglobuotu senatneigs i naizavārtu, ka ikona ir nupat izgleznuota.

Munā pīredzē cytim kolegim ir bejuse ikona, kura stypri jūceigi reagēja ar materialim, ar kurim parosti teik struoduots. Piec padzilinuotuokys izpietis palyka skaidrys, ka ikona speciali ir sataiseita vacuoka, kab tū puordūtu par leluoku naudu. Tok ar taidu gadīni asu sasastopuse tik vīnu reizi.

Ikonys augšdaļā parosti ir nūsaukums, vēļ studeju laikā vuicejomēs senkrīvu volūdu. Bīži viņ ikonu uzrokstūs teik izmontuoti saeisynuojumi, tod vajag būrtīs cauri i meklēt informaceju. Vystik vairumā ikonu atsakuortoj popularuokī sižeti, rešuok saīt struoduot pi mozzynomu sižetu. Ikonu aizmugurē parosti ir pīfiksāts tuos autors. Vystik vysā bīži ir bejuši gadīni, kod autoru izdzieš, nūtryn, kab nabyutu zynoma ikonys pīdareiba. Deļtam kaidā šaļtī draudzis suoce izmontuot zeimūgus, kas teik īspīsti, piec tuo var atpazeit pīdareibu. Taids, pīmāram, ir Rēzeknis vacticeibnīku draudzei. Ka nu kaidam saīt ikonu “aiznest”, tū nabyus īspiejams puordūt, kam tuos pīdareibu varēs vīgli izsekuot.”

Dorba lauks – Latgola

“Vairums ikonu, kurys restaureju, īt nu Latgolys regiona, niu darbneicā ir ari vīna nu Reigys, vakar atvede vīnu tepat nu Rēzeknis. Pamatā dīvnomu draudzis ir īinteresātys uzturēt sovu āku i tuos īkuortuojumu. Privateipašnīkim ir drupeit baist, jī ir stypri skeptiskuoki. Privatī vysubīžuok grib reali atīt iz darbneicu vysu apsavērt i puorvaicuot, tik tod nūtyc, ka te reali nūteik restauraceja. Vysuvaira restaureju taišni pareizticeigūs i vacticeibnīku ikonys, katuolim vairuok ir gleznu. Kai jau saceju, gleznys deļ mane ir ūtrajā plānā, tuos es pamatu tim restauratorim, kuri specializejās taišni gleznu atjaunuošonā.

Pa munam, cylvāki gona bīži nanūjauš, cik vierteigs ir tys prīškmats, kas stuov jim sātā. Daudzi ikonys dabuojuši montuojumā nu seņču i sovā ziņā par tom ryupejās, vystik, maņ redzīs, ka na da gola apsazynoj tūs vierteibu.

Kod es suoču vuiceitīs restauraceju, religeja deļ mane nūteikti nabeja svareigs faktors, dūmoju, ka jauneibā tys mums vysim ir dīzgon rakstureigi. Tok ar godim asu suokuse vaira īsadzilinuot ari religiskajuos detaļuos. Eipaši saīt pieteit ikonu sižetus, vys iz bazneicu taipoš bīžuok īmu dorba dareišonuos, na lyugšonuos, tok, īspiejams, vysam sovs laiks.”

Pīsaturēt pi sovys specifikys

“Ir bejuši atseviški interesanti pasyutejumi, nu kurūs vystik asu atsasacejuse. Es pamatā atsasoku nu cyta veida izstruoduojumu, kas nav ikonys i nav muns lauceņš. Vīnreiz mani uzrunuoja klients nu Igaunejis, kab atjaunuot leli. Atsyuteja e-postā fotografejis, vystik, pa munam, tei lele, koč i šmuka, drupeit izavēre piec taidys, kuru varātu lītuot nazkaidūs ritualūs. Nūsyuteju klientam Latvejis Restauratoru bīdreibys sātyslopys adresi, aicynuoju tī vaicuot piec kaida meistara, mož kaidam interesēs.
Vēļ vīns Reigys muzejs mani uzrunuoja atjaunuot apgleznuotys ūlu čaulys. Respektivi, ūlom vyduceits ir iztukšuots i apgleznuotys čaulys. Nu taida dorba ari vystik atsasaceju. Tok nivīnam ikonys pasyutejumam gon naasu atsacejuse.”

Prīškmati ar godu symtu viesturi

“Senejuokuo ikona, kurū asu restauriejuse, varātu byut 17. godu symta beigu. Piec vizualūs komponenšu var raudzeit nūsaceit aptuvanū ikonys izgataveišonys laiku. Vys, ka gribīs zynuot pavysam precizi, ir juosagatavej mozs parauga gabaleņš i juosyuta iz analizem. Reigā ir kimike, kura piec izmontuotūs materialu spiej precizi nūsaceit izstruoduojuma vacumu. Analizēs apsaver gruņti, pigmentus, piec tūs var nūsaceit vacumu. Kai jau īprīšk saceju, ir bejs gadīņs, kod ikonu nešu iz rentgenu. Sapakuoju i aiznešu. Labi, ka tei beja nalela ikona, leluoka izmāra dorbu, prūtams, navarātu tik vīgli aiznest. Lela izmāra ikonom i cytim muokslys dorbim ir cyts stuosts, tī izmontoj puorvītuojamū rentgenu, kuru cytreiz sauc ari par “zyrgu rentgenu”. Tys ir, kab zyrgu navest iz rentgenu, tys atbrauc da juo.

Rentgens beja vajadzeigs, kab saprast, kas atsarūn iz viersmys. Konkretajai ikonai beja cīši daudz puorgleznuojumu. Ari pošys ikonys konstrukceja beja interesanta – nu vairuoku gobolu i vairuoku škārskūku. Navarēja ari saprast, kas eisti ir pa vydu – kūka voi metala gobols, beja vysaidi styprynuojumi i noglys. Prūtams, itys beja rats gadīņs, ar parostu ikonu vyss par reizi ir skaidrys.

Ka ikona tykuse puorgleznuota, vajag ryupeigai izpieteit i saprast, cik apuškā daudz palics nu originala. Ka nikuo daudzi nav, tod atjaunoj puorgleznuojumu. Vys, ka apakšejais originalais sluoņs ir labi sasaglobuojs, tod rauga atjaunuot tū. Ka puorgleznuojumam nav pareizi īvāruota tehnologeja, agruok voi vāluok tys suoc atsadaleit nu pamata viersmys, tod tū var nūjimt i tikt pi originala.

Vysubīžuok es dorbus restaureju pi seve darbneicā. Tok ir bejuši gadīni, kod braucu iz dīvnomu, taipoš cytreiz asu braukuse pi klienta iz sātu. Privateipašnīki bīžuok vystik grib, lai es nu suoku apsaveru ikonu tī, kur tei ir, pyrma jū vest pi mane iz darbneicu.

Prūtams, maņ pošai vysuvaira pateik struoduot pi seve darbneicā. Kam ite es varu īsarast i dūtīs paceli, kod gribu, poša naasu ni nu vīna atkareiga, taipoš nivīnam cytam nav par mani juouzatrauc. Ir bejs, ka maņ juostruodoj bazneicā, ikona beja lela, i tū nabyutu bejs pruoteigi puorvītuot. Tūreiz es sagaideju, kod beidzēs zīma, i pavasarī givūs pi dorba, kab draudzis cylvākim nabyutu deļ mane juokurynoj bazneica.”

Ari restauracejā vajadzeiga profesionaluo tuoļuokizgleiteiba

“Koč ari nu vaļsts pusis eisti nav praseibu deļ profesionaluos tuoļuokizgleiteibys, tok poša deļ seve, prūtams, vuicūs. Cytreiz Latvejis Restauratoru bīdreiba organizej kaidys apvuiceibys i braucīņus, cytu reizi ari poša apmekleju kaidu konferenci, skaitu vysaidus rokstus i pietejumus.

Laika gaitā mainuos ari materialu tehnologejis, ar vysom jaunajom pīejom ir vārts īpasazeit, saprast, kai ar tom struoduot. Ikonys pamatā teik gleznuotys ar dabeigim pigmentim. Sovpus tys, ar kū mes restaurejam, terpentins i vysaiduoki škeidynuotuoji, tī gon ir kīmiski i veseleibai na vysai draudzeigi. Deļtam struodoju ar dorba aizsardzeibys leidzeklim – na tikai ar cymdim, tok ari ar specialu sejis masku. Prūtams, vysu sevi skafandrā naīliksi, ir tvaiki, kas izgaroj i gribi nagribi kaida daļa īsasyuc uodā, teik īelpuoti. Tok deļtuo vajadzeiga loba vādynuošona i nadreikst puoruok ilgi aizastruoduot. Niu arviņ pīpraseituoki palīk videi draudzeiguoki materiali, ir daīmamys vysaiduokys želejis, kurys uzkluot i piec tam nūteireit, kab nūjimt tū sluoni. Tok vysubīžuok taipoš ir vajadzeigs styprais škeidynuotuojs.

Par dorba daudzumu syudzeitīs navaru, vairuok nimoz i nagrybātu. Ka byutu daudz pasyutejumu, vajadzātu struoduot mudruok, byutu vairuok stresa, mož kaidā šaļtī ari zustu kvalitate. Mums dorbs ir baļsteits kvalitatē, deļtuo – vysu ar māru.”