13. novembrī Daugovpiļs teatrī tiks prezentāta teatra kritikis i muokslys zynuotneicys Silvijis Geikinys gruomota “Daugavpils teātris”.

Juoatzeimej, ka tei ir pyrmuo gruomota, kurei piļneibā veļteita Daugovpiļs teatram. Tuos ītvorūs pastyprynuota viereiba teik veļteita taišni teatra viesturei – tuo kuopumim i krytumim, likvidiešonys brīsmem i cereibu pylnai atdzimšonai. Bez viesturiskim faktim teik apsavārta ari Daugovpiļs teatra repertuara daudzveideiba laiku grīžūs i tys, kai mainejusēs teatra lūma piļsātys multikulturaluos sabīdreibys acīs.

Silvija Geikina roksta: “Īsaverūt viesturis puslopuos, radzam, ka ir bejuši periodi, kod teatrs izkuops gondreiž voi pošuos augstuokajuos muokslys viersyunēs i lics par sevi runuot vysai Latvejai, ir bejuši laiki, kod teatris izmiseigai raudzejs puorvarēt leidzonuma gryuteibys i ir bejs ari tai, ka īstudiejumu muokslinīcyskais leimeņs bejs tik zams, ka lics runuot par teatra likvidiešonu voi reorganizaceju. (…) Pādejūs godūs Daugovpiļs teatrī saradzama muokslinīcyska ceļšonuos, i Latvejis teatru kūpainā Daugovpiļs teatris suoc ījimt sovu muokslinīcyski nūzeimeigu i sovpateigu vītu.”

Gruomota “Daugavpils teātris” veiduota ar Daugovpiļs piļsātys dūmis finansialu atbolstu.