24. februarī Rēzeknis Tehnologeju akademejis (RTA) Muokslys terasē nūtyka latgalīšu rakstnīka Raibuo ūtruos stuostu gruomotys “Zalta tesmini” prezentaceja. Tei īsasuoce ar Raibuo vuordim: “Dori, kū dareidams, beiguos padori pats, partū pasuokumu vadeišu es.”

Kluotynasušī tyka sapazeistynuoti ar gruomotu – tamā pavysam ir pīci stuosti ar vysai sovpateigim nūsaukumim, par pīmāru, “Slapkaveiba Aglyunā”, “Demo” i cyti. Gruomotys beiguos ir izveiduota vuordineiceņa, kurymā ir paskaidruoti naskaidrī vuordi, frazeologismi. “Zalta tesmiņu” radeišonā Raibajam beja izaveiduojuse sadarbeiba ar underground muokslinīku Guntix, kurs sapazeistynuoja pasuokuma apmaklātuojus ar stuostu fragmentim. Nūtyka ari nalels konkurseņš, kurymā, aizdūdūt gruomotys autoram sev interesejūšus vaicuojumus, interesantuokuo autors varēja bolvā sajimt gruomotu.

Pasuokuma ūtrajā daļā nūtyka diskuseja par myusdīnu latgalīšu literaturys augšom i lejom. Tamā RTA docātuoja Ilga Šuplinska aicynuoja nūsaukt zynomuokūs latgalīšu autorus, kai ari aizdeve aktualu vaicuojumu – voi vyspuor ir vajadzeigs raksteit latgaliski?

Gruomotys prezentaceja nūtyka pozitivi humoristiskā jutūnē. Nūslāgumā sevkuram interesentam beja vareiba īsaguoduot sovā eipašumā stuostu gruomotu “Zalta tesmini”, kai ari nūsafotografēt ar tuos autoru.

Puordūmuos par radzātū dalejuos prezentacejis apmaklātuoja i RTA absolvente Gita Nagle: “Atīt iz gruomotys prezentaceju mani pamudrynuoja diveji faktori. Pyrmkuort, tys, ka personeigi zynu autoru, i ūtrais, ka gribieju drupeit vaira izzynuot par gruomotu. Raibuo rodūšū daiļradi vierteju pozitivi, partū ka jis nasabeist izsaceit sovu redzīni i dūmys par tū, kas nūteik pasaulī, i par sev tyvom temom ar veseleiga humora davu. Pyrmī īspaidi – nūteikti grybu puorskaiteit itū gruomotu! Parosti naraugu izsaceit redzīni par lītom, kū nazynu, tok prezentaceja mani īinteresēja, partū juosuoc tik skaiteit.”

[Show slideshow]

Informaceju sagataveja: RTA Sabīdryskūs attīceibu nūdaļa

Kartenis: Māris Justs