Izstuodē stuosta par Sibira latgalīšim
Latvejis Nacionalajā bibliotekā atkluota izstuode par Sibira latvīšu cīmim, tymā vydā ari par Timofejevku, kur vēļ var dzierdēt latgalīšu volūdu.
Vairumam Sibirs saistās ar 1941. i 1949. goda deportacejom i tragiskajim paviersīnim daudzu Latvejis ļaužu liktiņūs. Tūmār ir ari cyts Sibirs – vīta, kur latvīši daleji lobu pruotu, daleji ekonomisks apstuokļu deļ puorsacēle iz dzeivi jau 19. godu symtā. Tūlaik Sibirs daudzu pruotūs beja īspieja pīpiļdeit sovys cereibys i sapynus, tei beja “zeme, kur pīns i mads tak”.
Izstuodē “CITA SIBĪRIJA – latviešu ciemi Timofejevka, Lejas Bulāna, Sukinava” apkūpuoti 2015. goda ekspedicejis īspaidi i rezultati, snādzūt īskotu treis Sibira latvīšu cīmu dzeivē i viesturē. Izstuode apsaverama da ituo goda septembram LNB dorba laikā, īeeja bez moksys.
LaKuGys arhivā atrūnami ari vairuoki roksti par latgalīšu izceļuošonu iz Sibiri i tīnis kulturys dzeivi: “Latgalīši Sibīrī 19. godusymta beiguos i 20. godusymta suokuos”i “Latgalīšu izgleiteibys i kulturys dzeive Sibirī 20. gs. 20.–30. godūs”.
Karteņa: E. Husare
