Rokstu sagataveja: portals lakuga.lv

Sastdiņ, 26. junī, iz sasatikšonu ar kriminalromanu autoru Aldi Bukšu aicynoj Lūznovys muiža. Itei sasatikšona ar kriminalromanu “Parādu piedzinēji” i “Brāļi/Bruoli” autoru, kurs īt nu Zīmeļlatgolys, nūslēgs cykla “Literaruos sarunys Lūznovys muižā” ituo gods sezonu, viestej informaceja Lūznovys muižys sātyslopā.

Literaruos sarunys Lūznovys muižā jau catūrtū sezonu ir muižys kulturys nūtikšonu goda daļa, sarunuos izzynojūt i vaira īpazeistūt dažaidu žanru autorus kai nu Latgolys, tai cytu Latvejis vītu. 2020./2021. goda sezonā muižā ir bejuse sasatikt ar dzejneicu Inesi Zanderi, rakstneicu Noru Ikstenu, literatu, muokslinīki i etižu teatra “Nerten” akteri Svenu Kuzminu, kura dzymtuo piļsāta ir Rēzekne, bet niu varēs vaira izzynuot par Alda Bukša raksteišonu i dzeivi. Ar Aldi sasarunuos literarūs sarunu kuratore, literaturzynuotneica Ilga Šuplinska. Ituos sezonys literarūs sarunu ciklys ir eipašs ari ar tū, ka sasatikšonom attuolynuoti pīsaslādz Čikagys latvīšu literatu kūpys i Minsteris skaiteituoju kluba “Misteres grāmatmīļi” dalinīki.

Aldis Bukšs, kurš kasdīnā ir Latvejis Republikys tīslītu ministra biroja vadeituojs, ir jau diveju spylgu kriminalromanu autors – 2015. godā izguoja juo debejis romans “Parādu piedzinēji”, bet 2020. goda golā kriminalromans “Brāļi/Bruoli”. Gruomota ir eipaša ar tū, ka tys ir pyrmais kriminalromans latgaliski i vīna nu nadaudzūs gruomotu, kas izdūta obejūs latvīšu volūdys variantūs – latgalīšu rokstu volūdā i latvīšu literarajā volūdā. Obeji romani atzineigi nūvārtāti skaiteituoju vydā, bet par “Bruoli” izdūšonu Bukšs sajiems Latgalīšu kulturys goda bolvu “Boņuks 2020”. Taipat Aldis Bukšs ir pylnmetražys filmys “Maiņa”, kas izguojuse 2020. godā, scenareja leidzautors. Vaira par Bukšu var puorskaiteit portala lakuga.lv intervejā, kas nūtykuse 2020. goda golā, ITE.

Sarunu ar Aldi Bukšu varēs pīdzeivuot iz vītys muižā 26. junī pīcuos stuņdēs vokora, kai ari tuos tīšraide byus daīmama Lūznovys muižys sātyslopā http://luznavasmuiza.lv.