Rokstu sagataveja: portals lakuga.lv

Svātdiņ, 12. decembrī, tīšraidē nu Rēzeknis beja konkursa “Latgolys prozys skaitejumi 2021” nūslāgums, kas beja ari daļa nu storptautyskuo festivala “Prozas lasījumi”. Konkursā par uzvarātuoju ūtrū reizi žureja atzyna Anneli Slišāni.

Ar sovu stuostu skaitejumim konkursa “Latgolys prozys skaitejumi 2021” pīsadoleja treis konkursā vysvaira punktus sajāmušūs dorbu autoris, bet tīšraidis vierzeituojs beja myusdīnu latgalīšu literaturai veļteituo raidīroksta “Puslopys” vadeituojs, muzikis Arņs Slobožanins.

Īsyuteitūs dorbus viertēja žureja: rakstneica Laima Kota, dzejneica, publiciste, dramaturge Anna Rancāne, Bolvu Centraluos bibliotekys vadeituoja Ruta Cibule i literaturzynuotneica Maija Burima.

Īsapazeisti ar konkursa “Latgolys prozys skaitejumi 2021” pyrmūs treis vītu sajiemiejom i konkursa nūslāguma dalineicom:

III vīta. Ilze Sperga ir rakstneica, publiciste i filologejis doktore, stuostu kruojuma “Dzeiveiba” i bārnu gruomotys “Munā sātā” autore. Par sovim literarajim dorbim i publikacejom sajāmuse septenis Latgalīšu kulturys goda bolvys “Boņuks”. Kruojums “Dzeiveiba” bejs nomināts Latvejis Literaturys goda bolvai 2015, itūgod stuosti nu tuo izskanēja pyrmajūs radejis lasejumūs latgaliski. Dreizumā izīs Ilzis dzejūļu kruojums bārnim “Vuškeņa iz pļovys”.

II vīta. Evija Martukāne-Laganovska ir Nacionaluos enciklopedejis redaktore, kurai dzymtys saknis dzili īsastīp Latgolā. Kasdīnā Evijai pateik vāruot ļauds i nūtikšonys, pīraksteit radzātū, jei par sovu guru stuostu veiduošonā tur Rūdolfu Blaumani. Juos stuosti i roksti publicāti dažaidūs žurnalūs i medejūs Latvejā i uorpus tuos. Evija ir pīsadalejuse “Prozys skaitejumūs” i Reigā, i ari Kūrzemē, bet niu ir ceļā iz sovu pyrmū stuostu gruomotu.

I vīta. Annele Slišāne ir tekstilmuokslineica i rakstneica, ari pārnejuo goda konkursa “Latgolys prozys skaitejumi” uzvarātuoja, gruomotu “#100dečiLatvijai” i “Tuoraga stuosti” autore. Par projektu “#100dečiLatvijai” sajāmuse Latgalīšu kulturys goda bolvu “Boņuks 2018”. Itūgod deču stuosti izguojuši ari audio formatā, kai ari zeimu volūdā i braila rokstā. Niu Annele struodoj pi “Tuoraga stuostu” turpynuojuma.

Latgolys prozys skaitejumu 2021 īrokstu var nūsavērt ite:

“Latgolys prozys skaitejumi 2021” nūslāguma nūtikšonu taiseja bīdreiba “LgSC”, pasuokuma režisore Amanda Anusāne, bet konkursa nūtikšonu atboaļsteja Vaļsts kulturkapitala fonds, festivals “Prozas lasījumi” i literaturys, publicistikys i viesturis žurnals “Domuzīme”.

Galerejā konkursa “Latgolys prozys skaitejumi” nūslāgums, foto Amanda Anusāne.