Kū es varu pasaceit tik latgaliski?
Rokstu sagataveja: portals lakuga.lv
Šudiņ, 21. februarī, vysā pasaulī teik svieteita Dzymtuos volūdys dīna. Tuos mierkis ir dagrīzt sabīdreibys viereibu volūdu daudzveideibai i dzymtuos volūdys vierteibai i skaistumam. Par gūdu itai dīnai treis cylvākim, kurūs rodūšuo darbeiba saisteita ar latgalīšu rokstu volūdu, aizdevem vaicuojumu, kas ir tys, kū jī var pasaceit tik latgaliski, i kas tik eipašs jim ir itamā volūdā.
Annele Slišāne, tekstilmuokslineica i rakstneica:
Volūda – pats napīcīšamuokais cylvākam, runuot – byut par cylvāku. Latgalīšu volūda maņ ir dzymtuo volūda, jimā runojūt, jiutūs vysod kuo dvorā, pi sovejūs. Tuo pa eistam ai sovīm mozejīm bārnīm varu runuot toik latgaliski, jūs samīļuot, byut ai jīm kūpā. Runuot latgaliski ir tuo, kuo cept sovu maizi sovai saimei i tū iest, cytuos volūduos veikalā toik pierktuo. Vusuoda, bet na sova. Latgaliski vuspatīsuok varu runuot par prīcu, laimi, bādom i suopi. Tuo pavusam pa eistam par tū runuot.
Amanda Anusāne, foto entuziaste i latgaliskuo pīkritieja:
Naatkareigi nu tuo, kū es saceitu, ar saimi vysod i lai voi kas, runoju latgaliski. Runojūt latviski, jiutūs tai, kai ba runuotu ar svešu cylvāku. Cytys frazis voi vuordi, kurus muna mute izsoka sevkurā kompanejā, byutu: Babeņa; Sāta; Dzeraune; Es asu latgalīte voi es īmu nu Latgolys; Vasals; Pīdūd; Nā; Nui; Paļdis; Kai dzelys?.
Bruolāns, repers:
Tei ir muna dzymtuo volūda, es dūmoju latgaliski, attīceigi deļtuo ari varu izasaceit vysprecizuok. Rokstūt muzyku, asu īvāruojs, ka tikai latgaliski varu vyspatīsuok, ar emocejom nūdūt klauseituojim tū viestejumu, kuru asu tymā breidī izdūmuojs izlikt iz lopys. Cenšūs vysuos situacejuos piec īspiejis lītuot latgalīšu volūdu i lepojūs, ka asu latgalīts.
