Rokstu sagataveja: portals lakuga.lv

Kab veicynuotu latgaliskuos kulturvidis saglobuošonu i atteisteibu iz prīšku, Rēzeknis nūvoda pošvaļdeiba izsludynuojuse latgaliskuos identitatis atbolsta programu, kuruos rezultatā byus radeiti i Rēzeknis nūvodā realizāti vizuali kulturvidis i muokslys produkti. Konkursa kuorteibā finansiali tiks atbaļsteita vizualuos identitatis i reklamys materialu veiduošona, kurūs lītuota latgalīšu rokstu volūda i simbolika.

Kai pīmāri vizualuos identitatis i reklamys materialim varātu byut ceļu, īlu, apdzeivuotu vītu zeimis i apzeimiejumi, nūruodis, informativi stendi, īstuožu i organizaceju nūsaukumi, uzroksti, izkuortnis, reklamys bukleti, afišys, iedīņkartis, etiketis, instrukcejis, aprokstūši i kulturizgleitojūši materiali i tt.

Konkursā var pīsadaleit Rēzeknis nūvoda pošvaļdeibys īstuodis, fiziskys personys i juridiskys personys, kurūs darbeiba ir tīši saisteita ar Rēzeknis nūvodu. Izveiduotajim materialim juoatbylst latgalīšu rokstu volūdys raksteibys nūsacejumim.

Rēzeknis nūvoda dūmis deputats, Izgleiteibys, kulturys i sporta vaicuojumu pastuoveiguos komitejis prīšksādātuojs Guntis Rasims (Konservativī) izsoka prīcu, ka itūgod pošvaļdeibys budžetā izadevs atrast leidzekļus ari latgaliskuos identitatis atbolsta programai. “Ruodīs, ka par itū vaicuojumu sabīdreibā ir auguse izpratne, daudzi cylvāki ir tykuši puori bierneibā voi jauneibā dabuotom traumom, kod latgalīšu volūda ir bejuse nūnycynuota voi diskrimināta. Varu saleidzynuot, pīmāram, beidzamūs desmit godu prizmā, kai Rēzeknis nūvoda deputati verās iz itaidu vaicuojumu. Ka īprīšk vysod atsaroda cytys prioritatis, tod niu ar godim ir vairuojusēs izpratne, ka myusu lokaluo, latgaliskuo identitate i juos atainuojums vizualajā vidē var veicynuot kai turismu, mozuos i videjuos uzjiemiejdarbeibys atteisteibu, tai styprynuot myusu pošu pošapziņu. Piec ituo pyrmuo eksperimenta goda ari redzēsim, piec kaidu vizualuos identitatis formu ir pīprasiejums pošim īdzeivuotuojim, navaļstiskajom organizacejom. Tod ari izdareisim secynuojumus, kam vēļ juopīgrīž leluokuo viereiba. Tok juoatzeimoj, ka ari da šam Rēzeknis nūvodā jau ir bejuši uzroksti latgaliski, pīmāram, pi Nautrānu vydsškolys ir uzroksts kai latgaliski, tai latvīšu literarajā volūdā.”

Kūpejais daīmamais konkursa finansiejums ir 3000 eiro, maksimalais finansiejums vīnam projektam – 1000 eiro.

Dasasaceit konkursam var da 27. maja, projekts juoeistynoj nu 2022. goda 1. juļa da 10. decembra. Vaira informacejis par konkursu var atrast ITE.