Rokstu sagataveja: portals lakuga.lv

Rēzeknē, Rēzeknis Tehnologeju akademejā (RTA) i Latgolys viestnīceibā GORS, 16. i 17. junī nūtiks storptautyska zynuotniska konference “Regionaluos volūdys izgleiteibā: nu teksta leidz tekstprateiba”, viestej konferencis reikuotuoji. Konferencis mierkis ir saleidzynuot pīredzi, pietnīceibys perspektivys i datus nu vysaidu Eiropys i pasaulis regionalūs volūdu kontekstu, i diskutēt par pīejom latgalīšu volūdys vuiceišonā i īsavuiceišonā.

Konferencis laikā tiks apsprīsti itaidi temati: kai vuiceit regionalū volūdu atkareibā nu potencialuo volūdys apgivieja mierku; kai volūdu vuiceitīs grybātu poši školāni; ar kaidim pajiemīnim i metodem atteisteit skaiteišonys prasmi i prasmi raksteit (tekstprateibu); kuri digitalī reiki i resursi byutu nūdereiguokī tekstprateibys atteisteišonai regionalajuos volūduos; kai volūdu vuiceibā izmontuot vysaiduokus volūdu korpusus; kū īkļaut regionalūs volūdu vuiceišonys saturā, ar kaidim tekstim struoduot; kai paaugstynuot motivaceju i interesi vuiceitīs regionaluos volūdys i cyti.

Fokuss byus iz tūs regionalūs volūdu, kas ir lingvistiski i identitatis vaicuojumūs tyvai nacionalajom volūdom i par kuruom bīži teik diskutāts statusa sakarā (volūda voi dialekts). Tai, pīmāram, Latvejā – latgalīšu volūda, lejisvuocu volūda Vuocejā, skotu volūda Skotejā, veru volūda Igaunejā voi cytys regionaluos volūdys.

Konferencē pīsadaleis kai vītejī pietnīki, tai ari gosti nu Igaunejis, Leitovys, Sūmejis, Vuocejis, Pūlejis, Rumanejis, Grīkejis i cytom vaļstim.

Konferencis dorba volūdys: latgalīšu, latvīšu i angļu. 16. junī konference nūtiks RTA, bet 17. junī – Latgolys viestnīceibā GORS.

Ar konferencis programu var īpasazeit ITE.