Latgolys Kulturviesturis muzejs reikoj zynuotnyskūs skaitejumus i diskuseju par latgaliskū identitati

Latgolys Kulturviesturis muzejs reikoj zynuotnyskūs skaitejumus i diskuseju par latgaliskū identitati

Rokstu sagataveja: portals lakuga.lv

31. martā 13.00 stuņdēs nūtiks Latgolys Kulturviesturis muzeja sadarbeibā ar Izgleiteibys i zynuotnis ministrejis Latvejis Zynuotnis padūmi reikuotī tīšsaistis zynuotniskī skaitejumi i diskuseja “Latgale vakar, šodien, rīt: latgaliskās identitātes jautājumi”, informej muzeja puorstuove Svetlana Dudarenoka.

Pasuokums nūtiks tikai tīšsaistē, kam varēs sekuot leidza ITE. Tys paradzāts kai daļa nu vaļsts pietejumu programys “Letonika” projekta «Identitāšu ainavas: vēsture, kultūra un vide» (Nr. VPP-LETONIKA-2021/1-0008), kura partneri ir Latvejis Universitatis Literaturys, folklorys i muokslys instituts, Rēzeknis Tehnologeju akademeja, Līpuojis Universitate, Latvejis Kulturys akademeja, Latvejis Muokslys akademeja.

Rēzeknis Tehnologeju akademeju projektā puorstuov vodūšais pietnīks, Dr. hist. Vladislavs Malahovskis i pietneica, Dr. philol. Olga Senkāne. Malahovskis, kurs ir ari Latgolys Kulturviesturis muzeja specialists kulturviesturis vaicuojumūs ari byus zynuotnyskūs skaitejumu i diskusejis moderators.

Muzejā skaidroj, ka jī pastuoveigi rauga organizēt pasuokumus, komunicēt ar sabīdreibu. Vīns nu taidu pīmāru ir pasuokums “Vēstures mirkļu pietura”, kuru īrostai rauga pīskaņuot kaidai jubilejai. Itūgod opolu jubileju ir moz, partū atrosts veids, kai komunicēt ar sabīdreibu par vysod aktualu temu, pīsaistūt ari puorstuovus nu akademiskūs apryndu.

Pasuokumā uzastuos Rēzeknis Tehnologeju akademejis pietneica, Latvejis Universitatis filozofejis doktorante Olga Senkāne (“Kā nepazust piederību tīklojumos: latgalieša identitāšu pamatkomplekts”), Latgolys Kulturviesturis muzeja specialists, Rēzeknis Tehnologeju akademejis vodūšais pietnīks Vladislavs Malahovskis (“Latgale un latgalieši: daži identitātes aspekti vēsturiskā griezumā”), Nacionaluos enciklopedejis golvonais redaktors Valters Ščerbinskis (“Latgale un latgaliskums Nacionālajā enciklopēdijā”), 14. Saeimys deputats, Latgolys apakškomisejis vadeituojs Edmunds Teirumnieks (“Reģionālās identitātes stiprināšana: Latvijas Republikas Saeimas Latgales apakškomisijas darba aktualitātes”) i Latgolys Kulturviesturis muzeja golvonuo kruojuma globuotuoja Renāte Vancāne (“Reģionālās identitātes stiprināšana: Latgales Kultūrvēstures muzeja krājums un darbība”). Piečuok paradzāta diskuseja.

Print Friendly, PDF & Email