Rokstu sagataveja: portals lakuga.lv

Taišni pyrma Latgolys kongresa dīnys sastdiņ, 26. aprelī, Rēzeknē jau 25. reizi nūtiks skotuvis runys konkurss “Vuolyudzāni” i 24. reizi byus sasatikšona atkluotajā latgalīšu rokstu volūdys i kulturviesturis olimpiadē vydsškolānim. Rūsynojūt školu jaunuotnē interesi izzynuot Latgolys kulturviesturi, īpazeit kulturpersoneibys, vuiceitīs latgalīšu rokstu volūdu i skaiteit latgaliski, obejom nūtikšonom pīsasaceit aicynoj Latgalīšu volūdys, literaturys i kulturviesturis asociaceja (LVLKŠA) – portalu lakuga.lv informej asociacejis vadeituoja Veronika Dundure.

Ituo gods konkursā i olimpiadē eipaši tiks gūdynuotys Latgolys kulturviesturis personeibys – Pīters Miglinīks, kuram itūgod 175 godu jubileja, Nikodems Rancāns, kuru atguoduosim 155 godu jubilejā, i Ontons Kūkuojs, kuram svieteitu 85 godu jubileju. Skotuvis runys konkursā “Vuolyudzāni” aicynuoti pīsadaleit pyrmsškolys vacuma bārni, 1.–12. klašu školāni, ari studenti. Kotram dalinīkam juosagatavej diveju daildorbu fragmenti latgaliski. Vīns daildorbs īteicams nu Ontona Kūkuoja dorbu.

Atkluotajā latgalīšu rokstu volūdys i kulturviesturis olimpiadē var pīsadaleit vyspuorizgleitojūšūs školu 10.–12. klašu komandys 3–5 školānu sastuovā. Taipat sovys zynuošonys par Latgolu aicynuoti puorbaudeit i studenti. Pīcuos olimpiadis kuortuos, nu kurūs tradicionali namaineiga ir 1. kuorta ar latgalīšu rokstu volūdys zynuošonu puorbaudi, kam jau 25 godus aizdavumus sagatavej profesore Lideja Leikuma, i 5. kuorta ar Latgolys kulturtestu ap pārnejā godā svareiguokajom nūtikšonom latgalīšu kulturā, kū pīduovoj latgalīšu kulturys ziņu portals lakuga.lv (kai īrosts, testu piečuok byus vareiba izpiļdeit ari portala skaiteituojim). Itūgod 2. kuorta veļteita latgalīšu dzīsminīkam, zemnīku tīseibu aizstuovam Pīteram Miglinīkam, 3. kuorta – goreidznīkam, rakstnīkam i Latgolys atmūdys kusteibys dalinīkam Nikodemam Rancānam, bet 4. kuorta – dzejnīkam i muokslinīkam Ontonam Kūkuojam.

Pīsasaceit skotuvis runys konkursam i olimpiadei var da 2025. gods 18. apreļa, aizpiļdūt iz izgleiteibys īstuodis veidlopys sataiseitu pīsacejumu i syutūt LVLKŠA iz e-postu ltgasoc@gmail.com. Vaira dazynuošonai par konkursa nūsacejumim nūlykumā ITE, bet ap nūsacejumim, aizdavumim i īsacejumim olimpiadei nūlykumā ITE.

Skotuvis runys konkurss “Vuolyudzāni” i atkluotuo latgalīšu rokstu volūdys i kulturviesturis olimpiade vydsškolānim byus 26. aprelī Rēzeknis Vaļsts 1. gimnacejā (Dziernovu īlā 3a, Rēzeknē). Nūtikšonu suokums 10 stuņdēs nu reita.

Pārņ pasuokumūs pīsadaleja 26 izgleiteibys īstuožu puorstuovi kai nu Latgolys, tai cytu Latvejis vītu – skotuvis runys konkursā “Vuolyudzāni” beja 55 dalinīki, bet olimpiadē školys puorstuovēja 7 komandys. Vaira izzynuot, kai nūtikšonuos guoja pārņ i kai ir ar latgalīšu volūdu jaunīšu vydā, var portala lakuga.lv žurnalistis Martys Puzākys stuostā ITE.

Konkursu i olimpiadi atbolsta Rēzeknis nūvoda pošvaļdeiba, latgalīšu kulturys kusteiba “Volūda”, Rēzeknis Tehnologeju akademejis Regionalistikys zynuotniskais instituts, Latgalīšu kulturys bīdreiba, Rēzeknis Vaļsts 1. gimnazeja i latgalīšu kulturys ziņu portals lakuga.lv.