Latgalīšu volūda jaunuos paaudzis vydā. Atsavieršona iz “Vuolyudzānim” i latgalīšu olimpiadi

Latgalīšu volūda jaunuos paaudzis vydā. Atsavieršona iz “Vuolyudzānim” i latgalīšu olimpiadi

Rokstu sagataveja: Marta Puzāka, portals lakuga.lv

27. aprelī, Latgolys kongresa dīnā, nu jau 23. reizi nūtyka vaļsts atkluotuo latgalīšu rokstu volūdys i kulturviesturis olimpiade i 24. skotivis runys konkurss “Vuolyudzāni”. Itūgod Rēzeknis Vaļsts 1. gimnazejā puļcējuos 26 izgleiteibys īstuožu puorstuovi – sagataveitūs runys dorbus skaiteja 55 “vuolyudzāni”, tok zynuošonys olimpiadē pīruodeja septenis komandys.

Kai cytus godus, tai ari itūgod školāni puorstuovēja školys kai nu Latgolys, tai ari nu tuoļuoku apleicīņu Latvejā, par pīmāru, beja īsaroduši pat nu 300 kilometru attuoluo Tukuma.

Apreļs ir zeimeigs latgalīšu svātku mieness, i itūgod školānu konkursa nūtikšona sakryta ari ar Latgolys kongresa dīnu. Latgolys kongresam tei beja 107 godu jubileja. Taipoš ari ituo gods 23. aprelī apritēja 120 godu kai tyka atcalts drukys aizlīgums Vitebskys guberņā, tymā skaitā Latgolā.

Konkursā kluotyn asūšī, vārtātuoji, školāni i pedagogi cīši nūviertej volūdys breiveibu – vareibu tū naīrūbežuotai lītuot kasdīnā, kūpt i uzturēt dzeivu. Taipoš ari prīcojās par jaunīšu interesi par latgalīšu rokstu volūdu, literaturu i kuļturviesturi, ari volūdys lītuojumu kasdīnā.

Rēzeknis Vaļsts 1. gimnazejis direktors Juoņs Poplavskis svineigajā konkursa atkluošonā saceja: “Latgalīšu volūda beja, ir i byus, pasasokūt jums! Volūda ir juokūp, volūdai ir juodzeivoj. Personeigi maņ ir tai, ka ar daudzim draugim sasarunojam latgaliski i ari teleponā sasarokstom latgaliski, tok maņ reizem ir taidys sovaidys sajiutys par tū, kai cylvāki atbiļd, kai roksta i kaids ir dūmu guojīņs. Pats pyrmais – mes dūmojam latgaliski i ūtrys – mums ir breivys īspiejis tū izmontuot kasdīnā. Nuokamuo līta – latgalīšu volūda ir cīši skaista! Tū skaistumu pasaulī nesit taišni jius!

24. skotivis runys konkursa “Vuolyudzāni” i 23. atkluotuos olimpiadis latgalīšu rokstu volūdā i kulturviesturē atkluošona, foto Marta Puzāka/portals lakuga.lv

Portals lakuga.lv uzrunuoja vairuokus jaunīšus, kas pīsadaleja skotivis runys konkursā ci olimpiadē, kab nūskaidruotu latgalīšu volūdys lītuošonys parodumus taišni jaunuos paaudzis vydā. Marta Batņa i Alise Alitkina puorstuov Ludzys piļsātys vydsškolu. Obejis meitinis ir latgalītis, tok sovā storpā runoj latvyski – īmesli tam nazyna, vys jau tys ir pīrodums.

Marta: ”Ludzā jaunīši latgaliski na cīši runoj sovā storpā, tok ar vacuokim gon. Es saimē runoju latgaliski tik ar tāvu. Nazynu, deļkuo tys tai. Laikam mamai saime ir latvyskuoka.”

Alise: “Nui, vaira saimēs runoj. Ari es runoju, bet tik ar mamu i vacuokū bruoli. Muna mama īt nu latgalīšu saimis, tok tāvs vaira nu krīvu saimis. Jaunīšim vīnkuorši nav pīrosts runuot sovā storpā latgaliski.”

Kai īmesļus tam, ka jaunīši sovā vydā latgaliski runoj mozuok, meitinis nūruoda, ka tys varātu byut deļtuo, ka daudzi jaunīši runuot naprūt, bet tik saprūt volūdu. Taipoš daudz ītekmej ari tys, ka saprūt, tok kautrejās atbiļdēt. Ari meitinis sovā storpā runoj latvyski, koč i interveju snādz pavysam breivā latgalīšu volūdā. Juos nūruoda, ka draudziņu kompanejā ir vairuokys, kas latgaliski narunoj, deļtuo jau ir īsaguojs, ka jaunītis sovā vydā kompanejuos runoj latvyski, tok latgalīšu volūda izskaņ viņ sātuos. Marta nūruoda: “Ka vajadzātu tagad suokt runuot ar Alisi latgaliski, dūmoju, ka piec minutu pīcpadsmit es jau pīrostu pi tuo.”

Vaicoju meitinem ari par tū, voi juos koč kod ir izjutušys nu apleicejūs pusis komentarus par latgalīšu akcentu. Meitinis iz reizis suoc smītīs i soka, ka nui. “Es uztveru tū atkareibā nu tuo, kū pats cylvāks dūmoj par Latgolu. Ka jam tei ir kai puorejuo Latveja, tod vyspuor tys nav puormatums, tok, ka jam ir tei dūmuošona, ka Latgola ir lauki, tod, nui, tys nav pateikamai,” soka Marta.

Atkluotuos olimpiadis latgalīšu rokstu volūdā i kulturviesturē dalinīki, foto Marta Puzāka/portals lakuga.lv

Kai olimpiadē, tai ari “Vuolyudzānu” konkursā pīsadaleja ari Alesja Kovalenko, kas puorstuovēja Viļānu Muzykys i muokslys školu. Meitine skotivis runys konkursā dabuoja 1. vītu, tok pīzeist, ka kasdīnā latgalīšu volūdu naizmontoj. Alesjai ir lela interese vuiceitīs latgalīšu volūdu – jei apmeklej ari interešu puļceņu, ir īrunuojuse tālu kinā “Vydsmuižys Annužys acim”.

“Šudiņ es skaiteju Ilzys Spergys “Breiveibu” i Aijis Mikelis dzejūli “Reizem mes varim paīt garum”. Gryušuok laikam beja tys, ka kasdīnā es reši izmontoju latgalīšu volūdu. Tekstā beja daži vuordi, kurus es na vysai saprūtu, tūs īsavuiceit beja dīzgon gryuši. Latgalīšu volūda maņ ir kai svešvolūda. Maņ ruodīs, ka latgalīšu volūda ir tei, kuru mums vajadzātu kūpt i zynuot, vuiceitīs, jo tei ir daļa nu myusu dzeivis, viesturis, kulturys,” stuosta Alesja.

Vaicojūt jai, kas pamudynuojs izruodeit tik lelu interesi vuiceitīs latgalīšu volūdu, meitine soka, ka tei bejuse juos školuotuoja Anita Vulāne, kas paaicynuojuse pīsavīnuot latgalīšu volūdys puļceņā.

“Es padūmuoju – paraudzeit jau var! Tod suocēs vysi konkursi, raksteišona, laseišona. Maņ pateik vuiceitīs latgalīšu volūdu, jo tei ir viesture. Es nasaceitu, ka tei ir cīši gryuta volūda, dreižuok interesanta,” soka Alesja.

Runojūt ari par volūdys vidi Viļānūs, Alesja pīzeist, ka tei ir daudzveideiga, tok var nūvāruot, ka jaunīši daudzi vaira suokuši kasdīnā lītuot latgalīšu volūdu. Īspiejams, tū ītekmej latgaliskuos ideņtitatis apsazynuošona. “Jaunīši Viļānūs runoj daudz, bet tys, kai jī runoj? Jī runoj pusi latvyski, pusi latgaliski i tū, kai ir pareizi, tū daudzi nazyna. Jī nasavuica pareizū volūdu, jī runoj tai, kai dzierd. Es skaitu, ka itūšaļt mozuok jaunīši kautrejās runuot latgaliski, kam mes asam latgalīši, i tys ir cīši labi. Krīvu volūda, prūtams, izskaņ vaira, nakai latgalīšu,” tai skaita Alesja Kovalenko.

Intervejai uzrunuots beja ari 10. klasis škoļnīks Andris nu Baļtinovys vydsškolys. Jis kūpā ar komandu pīsadaleja olimpiadē. “Ar saimi i leluokū dalu draugu kasdīnā runoju latgaliski, bet ir daudzi momenti, kod školā runojam latvīšu volūdā, jo na vysi muok runuot latgaliski. It kai jau jī saprūt, tok tu pats jiutīs naārtai, ka vysi apleik runoj latvyski, tok tu vīneigais runoj latgaliski,” stuosta jaunīts.

Andris stuosta, ka Baļtinovys pusē krīvu volūda izskaņ moz, tok leluokuo daļa jaunīšu školā runoj latvyski, rešuok latgaliski. Tok Andris nasakautrej runuot latgaliski ari cytā vidē, kai ari vēļ pavuiceit cytim.

“Juosoka, kod asu Reigā, es taipoš runoju latgaliski. Tys mani nikod nav atturiejs, ka es īmu nu Latgolys – runoju latgaliski sevkurā vītā i šaļtī. Niu es cīši stypri asu saisteits ar Rēzekni, spieļoju sporta klubā. Ir tai, ka jaunīši tī ari īt nu Latgolys, tok jī nasaprūt latgalīšu volūdu. Es it kai jim koč kū pavuicu. Jī vuicuos nu mane, i es pats vuicūs, vuicūt jūs. Vuicu vaira taidys frazis. Maņ ari ir draugi nu Jelgovys, jim ari vuicu latgalīšu volūdu. Jim nasaīt, tok jī ceņšās i jim tys cīši stypri pateik. Reizem tys ir vaira pa smīklam. Dažim ruodīs sovaidi vuordi, cyts soka, ka jī ir puorkrīvuoti. Juosoka, ka latgalīšu volūda sovā veidā ir unikala,” tai skaita Andris.

Školānu konkurss aizvadeits veiksmeigi. Skotivis runys konkursa “Vuolyudzāni” 1. vītys īgivieji 1.-4. klašu grupā ir Demiters Vistopols (Tukuma E.Birznieka-Upīša pamatškola), Lauris Deksnis (Sakstagola pamatškola) i Ieva Spīča (Gaigalovys pamatškola), sovpus 5.-8. klašu grupā Mārtiņš Bozovičs (Nautrānu vydsškola) i Helēna Slišāne (Baļtinovys vydsškola). Tok vydsškolānu aba 9.-12. klašu grupā pyrmū vītu dabuoja Alesja Kovalenko (Viļānu Muzykys i muokslys škola), Armands Kazinieks (Rēzeknis 5. vydsškola) i Lāsma Jurkāne (Rībeņu vydsškola).

Sovpus 23. vaļsts atkluotajā latgalīšu volūdys i kuļturviesturis olimpiadē uzvarātuoju laurus plyuce Drycānu vydsškola (školuotuoja Silvija Laizāne), sovpus ūtrū vītu dabuoja Ludzys piļsātys vydsškola (školuotuoja Laila Budreviča). Trešū vītu itūgod dabuoja Nautrānu vydsškola (školuotuoja Veronika Dundure).

Atkluotuo olimpiade latgalīšu rokstu volūdā i kulturviesturē, foto Marta Puzāka/portals lakuga.lv

Olimpiade nūtyka pīcuos kuortuos, puorbaudūt školānu latgalīšu literaturys, viesturis i kulturys zynuošonys, taipoš ari atjauteibu portala lakuga.lv sagataveitajā kulturtestā par 2023. gods zeimeiguokajom nūtikšonom latgalīšu kulturvidē.

Vysi dalinīki beja gondareiti par pavadeitū dīnu i pīzeist, ka raudzeis pīsadaleit skotivis runys konkursā i vaļsts atkluotojā olimpiadē ari cytugod. Daudzim školānim tei jau ir īrosta tradiceja. Itūgod pasuokumu atbaļsteja z/s “Kotiņi” ar saryupātom bolvom, taipoš ari “A12” duovuoja žurnalus i beja bolvys nu Rēzeknis Tehnologeju akademejis, Jura Cybuļa i Latgalīšu kulturys bīdreibys.

Fotogalerejā: skotivis runys konkurss “Vuolyudzāni” i atkluotuo latgalīšu rokstu volūdys i kulturviesturis olimpiade 2024, foto Marta Puzāka/portals lakuga.lv


Print Friendly, PDF & Email

Kalenders

May
21
Ūtr
15:00 Izstuodis “Juoņs nu Dzeņagola” a... @ Latgolys Kulturviesturis muzejs
Izstuodis “Juoņs nu Dzeņagola” a... @ Latgolys Kulturviesturis muzejs
May 21 @ 15:00 – 16:30
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]
22:05 Annele Slišāne. Tuoraga stuosti.... @ Latvejis Radio 1
Annele Slišāne. Tuoraga stuosti.... @ Latvejis Radio 1
May 21 @ 22:05 – 23:00
Annele Slišāne. Tuoraga stuosti. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
22
Tre
22:05 Egita Kancāne. Syltuo mola. Rade... @ Latvejis Radio 1
Egita Kancāne. Syltuo mola. Rade... @ Latvejis Radio 1
May 22 @ 22:05 – 23:00
Egita Kancāne. Syltuo mola. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
23
Cat
22:05 Valentins Lukaševičs. Casnāgu ma... @ Latvejis Radio 1
Valentins Lukaševičs. Casnāgu ma... @ Latvejis Radio 1
May 23 @ 22:05 – 23:00
Valentins Lukaševičs. Casnāgu maizeitis. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]