Rokstu sagataveja: portals lakuga.lv

19. julī Leiksnā piec ilguoka puortraukuma otkon atsagrīzs festivals “Muzykys skrytuļs”, kurā varēs dzierdēt vysvysaidu latgalīšu muzyku. Tymā pīsadaleis ari projekts “Vuordi” aba Edijs Rancāns, kurs sagatavejs ari ituos nedelis kulturys īsacejumus. Jis aicynoj na tik laistīs iz festivalu, tok ari nūbraukt iz lavandu lauku Nautrānu pogostā, kai ari apmeklēt Leivuona piļsātys svātkus.

Apmeklej “Lavandrūtas”!

Nūbrauc iz lavandu lauku “Lavandrūtas”, kas atsarūn Nautrānu pogosta Dekterūs. Tei ir unikala i lauku regionam naīrosta vīta, kur tevi sagaida nūmīrynūšs lavandu smuords i skaisti skoti, kurūs izdaiļoj lavandu violetuo kruosa. Kod esi laukā, dzierdi, kai bitis saņ i apleik skrīn viejs. Tamā skaņā ir kas eipašs – tei ir kai dobys muzyka, kas lānai aiznas vysys līkuos dūmys i klopotys paceli.

Lavandu lauks nav tik skaistumam – tī vari fotografētīs, izbaudeit mīru i harmoneju. “Lavandrūtas” ir vīta, kur sirds atsapyuš, a acs prīcojās. Ituo gods sezona ir leidz 25. juļam, i lauku var apmeklēt kotru dīnu (nu pyrmūdīnis leidz pīktdīnei nu 14.00 leidz 19.00, bet sastdīnēs i svātdīnēs – nu 12.00 leidz 19.00).

Muzykys svātki, kur kotrys varēs atrast sovu skaņu

19. julī vysi celi vess iz “Muzykys skrytuli” Leiksnā – vīnu nu vysinteresantuokūs muzykys festivalu Latvejā! Itamā dīnā skanis grīzsīs kai skrytuļs – nu folklorys i roka leidz metalam i hiphopam. “Muzykys skrytuļs” ir sajiutu, skaņu, muzykys i dobys festivals. Deļtam 19. julī esi Leiksnā! Ari maņ byus tei īspieja uzastuot, deļtam gaidu ari tevi!

Izbaudi i klausīs rokmuzyku

Jamūt vārā, ka “Muzykys skrytuļs” jau ir itymā nedeļgolā i es pats asu lels metala i roka muzykys pīkritiejs, īsoku pyrma dūšonuos iz Leiksnu velteit laiku ari latgalīšu muzykai, kas ir pylna ar emocejom i spāku.

Leivuona piļsātys svātki

Nu 15. leidz 19. juļam Leivuona piļsāta byus eists dzeiveibys centrys – suoksīs piļsātys svātki, kas itymā godā teik sūleiti eipaši kruošni i ar nūtikšonom boguoti. Pīci svātku vokori i dīnys aicynoj kai vītejūs dzeivuotuojus, tai gostus izbaudeit kūpā byušonu, kulturys boguoteibu i sirsneibu – ar dzīduošonu, doncuošonu, amatnīku darynuojumim, rūtaļom bārnim, muokslu, kulturu i vareibu sasatikt seņ naradzātim draugim.