Rokstu sagataveja: portals lakuga.lv

Par ituos nedelis īsacejumim guoduojuse Preiļu nūvoda Ārdavys muižys saimineica Maija Krasnā. Jei īsoka pasavērt plotuok i atrast sev saistūšu rudiņa atpyutu – voi tuos byutu pastaigys dobā, voi kulturys nūtikšonys, tok oktobris nabyut nav palāks!

Ļautīs rudiņa valdzynuojumam

Itei nedeļa Latgolā ir kai radeita, kab ļautīs rudiņam – kruosom, smuordim i mozim breinumim dobā. Pastaiga pa tyvuokū parku sovā cīmā voi piļsātā paliks par šmuku kaitu (spēli) ar godalaiku. Piļu i muižu parkūs doba poša ar vīglu ūtu zeimej ainovu gleznys, cikom pošys ākys dadūd nūslāpumaineibu. Ļaunīs pīdzeivuojumim i izbrauc kur naviņ tuoļuok, pīmāram, da Kruoslovys nūvoda Valnazara, pastaigoj apleik azaram, izbaudi kruosys kūku lopuos, syunuos i ūguos, sajiuti rudiņa smuordus.

Pīdzeivuojumu maklātuojim Teiču pūrs byus izcyla izviele – vīns nu leluokūs syunu pūru Baļtejā, kur dobys aizsardzeibys puorvaļdis darbinīka vadeibā da oktobra beigu ir vareiba dūtīs pastaigā i īsavērt itamā naskortajā ainovā. Breineiga vareiba, kū izmontuot ar draugim, rodim voi saimis lūkā! Ka gribīs vēļ vaira pīdzeivuojumu, var apīt Ješa azaram Kruoslovys nūvodā, voi pat ar laivu apsavērt tuo daudzuos solys.

Sovpus Rāznys azarā ir vareiba dūtīs izbraucīnī ar “Buru guru” jahtu “Sea Esta” voi mozū buru laivu “Magdalēna”. Zaltainī rudiņa braucīni daīmami leidz pat azara aizsaļšonai – tik juoatrūn syltuoks apgierbs i juosaļaun viejam!

Nūtikšonys ari kulturys baudejumam

Kulturys vītys itūnedeļ ir pīpiļdeitys ar sajiutom. Rudineigajā i romantiskajā Raiņa muzejā “Jasmuiža” vēļ vysu oktobri var izbaudeit Raiņa jauneibys romantiku vairuokuos izstuodēs – Anitys Savickys rūtu izstuode “Gaisma sudrabota” i Īvys Babris foto izstuode “Dabas elpa”, taipoš apsaverama ari Raiņam i Latgolys keramikai veļteituos ekspozicejis. Vēļ vīna breineiga vīta, kū apmeklēt rudinī, ir Laimis muzejs Indrā. Ite rūsynojās pozitivys emocejis, kas ļaun smeļtīs prīcu, radeit i īdvasmuot. Varbyut taišni ite sajussi, ka laime ir juogiun kotrā šaļtī i juobauda.

Voi zyni vēļ kaidu vītu, kur Latgolā nūgiut vosorys sajiutys? Kruoslovys nūvoda “Klajumūs”! Sastdiņ, 11. oktobrī, zyrgu sātā “Klajumi” byus Zemiņu dīna i vareiba satikt Zemiņu meitinis Skaidreiti i Evitu nu Zemiņu īleju Augšdaugovys nūvoda Leiksnā. “Klajumu kēkī” varēs nūgaršuot zemiņu sapynu ar saļdiejumu, kokteili, blīnus ar zeminem i kū tik vēļ nā. I, prūtams, ari baudeit lauku atmosferu ar zyrgu vāruošonu ganeibuos i pastaiguos pa Ūdu stygu.

Breineigs pīduovuojums kulturys baudeituojim ari nu Daugovpiļs teatra – 9. oktobrī Daugovpilī i 12. oktobrī Reigā vareiba apmeklēt filozofisku trilleri – laikmeteigū teatra spēli latgaliski “Kaids nūteikti atīs” ar pakuopeniski pīaugūšu sprīdzi kaida puora attīceibuos i tū, cik pūstūšu vātru dvēselē var radeit bailis nu svešuo i nazynomuo. Drupeit dramys i sprīdzis pīstuov rudineigai sajiutu spēlei!

Kurs vys ir sacejs, ka oktobris ir palāks? 10. oktobrī Latgolys viestnīceibā “Gors”, Rēzeknē, suoksīs 10. Storptautyskais vargaņu muzykys festivals “ORGANismi”. Iz atkluošonys koncertu beleti jau izpierkti, tok vēļ ir vareiba apmeklēt festivala nūtikšonys 11., 12. i 17. oktobrī.

Tok varbyut tova idealuo rudiņa nūdarbe saistuos ar golda kaitom (spēlem) sātā voi uorpus tuos? Pagastej omotola krūdzeņā Daugovpilī “Miezis & Co”, kurs 10. oktobrī organizej golda kaitu balleiti pozitivā i draudzeigā atmosferā vītā, kur piļsātnīcyskā gaisūtnē īmolkuot Eiropys styla ikonu dzierīņus i ari nazkū avangardisku nu Baļtejis regiona.

Itei nedeļa ir breineiga, kab apvīnuot rudiņa dobys valdzynuojumu ar kulturys nūtikšonom – vyss palīk tovā ziņā – laistīs dobā, garšuot rudiņa lobumus voi ļautīs muokslys i teatra nūskaņom.