TESTS: cik labi tu puorzynoj latgalīšu prozu?
Rokstu sagataveja: portals lakuga.lv
Itūgod jau sastū reizi Latgolys prozys skaitejumu finalā sasatiks kai pīredziejuši prozys latgaliski raksteituoji, tai suocieji. Vysi interesenti ir aicynuoti catūrtdiņ, 4. decembrī, Lūznovys muižā iz konkursa “Latgolys prozys skaitejumi 2025” nūslāguma pasuokumu. Pyrma tuo aicynojam portala lakuga.lv skaiteituojus puorbaudeit sovys zynuošonys latgalīšu prozā.
Par latgalīšu literaturys aizsuokumim var runuot nu 18. godu symta, koč i vysi pyrmī teksti beja goreiga satura, i raksteiba veiduojuos, pīlāgojūt pūļu ortografeju. 1904. godā piec latiņu drukys aizlīguma atceļšonys suoce izīt pyrmuos latgalīšu avīzis, tymuos beja ari literaturys rubrikys. Izaveidoja spieceiga latgalīšu goreiguo i laiceiguo inteligence, suoce izīt gruomotys. Vaira par latgalīšu literaturys viesturi i tuos atteisteibu vari puorskaiteit Valentina Lukaševiča škierklī “Latgaliešu literatūra” Nacionalajā enciklopedejā.
Koč i latgalīšu literaturys procesu ītekmiejuši vysaidi viesturyskī aspekti, tei aizviņ ir dzeiva ari myusu dīnuos i ījam nūzeimeigu vītu Latvejis kulturys laukā. Vīns nu latgaliski raksteituos literaturys veicynuošonys pasuokumu ir Latgolys prozys skaitejumu konkurss, kurs nūteik jau nu 2020. goda. Konkursu reikoj latgalīšu kulturys kusteiba “Volūda” ar mierki veicynuot jaunu raksteituoju pasaruodeišonu latgaliskuos literaturys telpā i dūt platformu autorim ari debejis dorbu publiciešonai.
Lai lūbās!
Rezultats
#1.
Ilze Sperga “Breiveiba”. Stuosts “Breiveiba” ir Latgolys prozys skaitejumu konkursa 2023. goda uzvarātuojs. Stuostu vari puorskaiteit voi nūsaklauseit autoris bolsā ITE.
#2.
Raibīs “Rosola vylynuojums”. Stuosts publicāts Raibuo pyrmajā stuostu gruomotā “Pyrma syltī” (2011). Tū vari puorskaiteit ITE.
#3.
Sandra Ūdre “Tīsys syla bolsi”. Sandrys Ūdris gruomotā “Tīsys syla bolsi” (2021) publicātī stuosti aptver vysaidus laikus i cylvākus, tok jūs vīnoj izmysuma voi vardarbeibys situacejis. Daudzys nu jūs atsakluoj kai latgalīšim pazeistamu, paaudzēs veidojušūs stereotipu atsakuortuošona. Tīsys syls ir reala vīta Baļtinovys nūvodā ar legendu par tū, ka tī Puncuļovys piļskolna vaļdinīks struopiejs ļauds, īrūkūt jūs da pusis dzeivus zemē – izdzeivuojs ci naizdzeivuojs. Tū vari puorskaiteit ITE.
#4.
Annele Slišāne “Tuoraga stuosti”. Stuostu kruojums “Tuoraga stuosti” (2021) saraksteits Bolvu nūvoda Upītes pusē autoris dzymtajā izlūksnē. Annele par sovim stuostim soka tai: “Tuoraga stuosti ir par variešonu, par cilvāka izaugšonu, par izaugšonu i byušonu par sīvīti. Tuorags kuo metamorfoze, kuo puortapšona. Kuo tuoda materija, kas caur saskuobšonu i korstumu palīk par jaunu i lobu vīlu.” Stuostus vari nūsaklauseit radejis lasejumu formatā ITE.
#5.
Juoņs Klīdziejs “Zalta kristeņš”. Vīns nu ratūs Juoņa Klīdzieja dorbu, kas pīraksteits latgaliski. Pyrmū reizi publicāts žurnalā “Sējējs” (1938) ar nūsaukumu “Benedikta armonika”. Piec Annys Rancānis scenareja, izmontojūt stuosta “Zalta kristeņš” motivus, 2011. godā tyka izjimta kina “Latgolys laikadečs”, kurys režisors beja Edgars Blinovs.
#6.
Naaizmierstule “Naktineica”. Naaizmierstule (eistajā vuordā Rozālija Tabine, 1890–1965) ir latgalīšu dzejneica i bārnu rakstneica, pyrmuos latgalīšu dzejprozys autore, pedagoge. Stuosts “Naktineica” atrūnams juos literarajā kruojumā “Lauku zīdi” (1934), kurs napaseņ tics puorizdūts i niu otkon daīmams sevkuram interesentam.
#7.
Aldis Bukšs “Bruoli”. Alda Bukša romans “Bruoli” ir pyrmais kriminalromans latgaliski. Obejuos latvīšu volūdys rokstu tradicejuos kriminalromans izdūts 2020. goda golā. Dorbu radioteatra versejā vari nūsaklauseit ITE.
#8.
Oskars Seikts i Līga Gagaine “Reitišku mads”. “Reitišku mads” (2000) ir erotizāts postmodernais romans latgalīšu literaturā. Vaicoj gruomotu sev tyvuokajā bibliotekā!
#9.
Egita Kancāne “Syltuo mola”. Stuostu kruojums “Syltuo mola” (2018) ir autoris debeja latgalīšu literaturā. Dalieji autobiografiskī stuosti ir nalelys sadzeivis ainenis par treju paaudžu sadzeivuošonu Vuorkovys nūvoda Andeņu cīmā. Tai kai darbeiba nūteik 80. i 90. godūs, tys ir sova veida pīminieklis vītai, tuo laika nūtykumim i cylvākim. Dorbu radioteatra versejā vari nūsaklauseit ITE.
#10.
Norberts Neikšānīts “Myura kolns”. “Myura Kolns” (1943) ir pyrmais pabeigtais i izdūtais latgalīšu romans. Tys paruoda 30. godu beigu Latgolys saimisteibu ekonomiskajā uzplaukumā, retrospektivi attāloj godu symta suokuma ainys i zemnīku sarežgeituos attīceibys ar muižu 1905. goda revolucejis laikā.
Komentari
Atbiļdēt
Breineigi! Paļdis par ideju i īlyktū prācu testa par literaturu sataiseišonā!!!