Rokstu sagataveja: portals lakuga.lv

Tikū nūsasliedzs Latvejis Televizejis muzykalais šovs “Pārdziedi mani!”, kurā pīsadaleja ari grupys “Laimas Muzykanti” liders i muziks Artūrs Uškāns, bet jau itūnedeļ, 20. janvarī, grupa poša aicynoj iz sovu 30 godu jubilejis koncertu Reigā. Deļtuo ituos nedelis īsacejumus, kurī vad iz Reigys pusi, sagatavejs taišni Artūrs.

“Laimas Muzykantu” zalta dzīsmis Reigā

Tai kai jau 11 godu dzeivoju Reigā, ituos nedelis svareiguokais pasuokums maņ ir taišni “Laimys Muzykantu” 30 godu koncerts Reigā. Jis byus 20. janvarī septeņuos stuņdēs vokorā VEF kulturys pilī. “Laimas Muzykantus” zyna daudzi, daudzi ir dzierdiejuši, taipat ir taidi, kuri nazyna, ka itū muzyku spielej taišni “Laimas Muzykanti”. Drupeit huliganiskuo, bet azartiskuo grupa muzicēs VEFā, byus dabojami 30 godu jubilejis albumi, taipat uzastuos grupys veterani nu Latgolys i Anglejis, kūpā ar mums byus dzīduotuojis Olga Rajecka, Kristīne Kārkle-Kalniņa, breineiguo bolsa eipašneica Baiba Ērgle. Cīši daudzi etnomuzykali rokeiga azarta i jautreibys. Beletu vaira nav daudzi, bet kaidu vēļ var dabuot i sev, juosaver “Biļešu Paradīzes” sistemā. Sasateikam!

Pusstuņde dvēselei multimedialā izruodē

Pasuokums, kas iz mani pamete lobu īspaidu i kas ir stacionars, ruodīs, ka var īspēt pīdzeivuot da juņa, ir multimediala izruode “Interlude”. Tī ir 30 minuti tikai sev pošam naaizmierstamā skanis i gaismys pīredzē. Reigys Reformatu bazneicys majestatiskuos telpys teik atdzeivynuotys taidā meditativā, multimedialā ceļuojumā. Kluotyn Vaļsts akademiskuo kora “Latvija” i gitarista Kaspara Zemīša gitaru treis dimenseju skaniejums, vysa saplyustūt ar Māra Kalvis muokslys projekcejom. Ka saīt byut Reigā, nūteikti īsoku aizīt da Vacreigys, atpyutynuot dvēseli eistyn grandiozā muzykys, gaismys i multimedialu attālu pasaulī.

Kastings – suokys kinu industrejis ceļam

Trešuo byus taida nūdereiga aktivitate, kas nav pasuocīņs. Ka ir sajiuta, ka gribīs fiļmētīs kinuos, reklamuos voi serialūs vysaiduos lūmuos, tod kastinga agentura “Norma Casting” nu 21. janvara da 23. janvara kotru dīnu nu divpadsmit stuņžu pa dīnu da septeņu vokorā Reigā, Mīra īlā 9, taisa attaiseitūs durovu dīnys, kur var aizīt, dabuot fotoseseju, aizpiļdeit anketu, i nav izslāgts, ka jums pīzvaneis i jius varēsit pīsadaleit kaidā kinā, reklamā voi serialā. Pīsasaceišona ir bez moksys. Kaidu biļdi nu fotosesejis piečuok var dabuot ari sev publiciešonai. Latvejai ir styprys komandys, kas nūdrūsynoj uorzemu filmu uzjimšonu, īspiejis ir vysaidys, par pīsadaleišonu fiļmiešonuos īrosts ir paradzāta ari atleidzeiba. Pats asu nūsafiļmiejs jau aptyvai 30 kinuos. Vīna nu pyrmūs pīredžu beja Vīstura Kairiša kinā par barikažu laiku “Janvāris”. Lai vysim vadās i lai jums lobys lūmys!