Rokstu sagataveja: portals lakuga.lv

Jau pīcpadsmytū reizi Latvejā teik reikuota Latvejis Metalmuzykys goda bolva, kurā itūgod tiks nūskaidruoti uzvarātuoji pīcuos kategorejuos. Pi diveju nominaceju tykuse ari latgalīšu folkmetala grupa “Varang Nord”.

Grupa “Varang Nord” ir nomināta divuos kategorejuos –  lobuokais 2025. gods metala albums i  lobuokuo 2025. gods koncertgrupa. Lobuokuo 2025. gods metala albuma kategorejā grupys albums “Mygla” sasaceņš ar vēļ četrim pārņ izdūtim metalmuzykys īrokstim. “Varang Nord” jaunuokū albumu veidoj desmit dzīsmis, nu kurūs deveņuos dzierdama latgalīšu volūda. Dzīšmu vokalajā izpiļdejumā pīsadola na tik grupas puorstuovi, bet ari treis gosti – Alex Under, Lesley Knife i Jānis Drēgeris. Albumā “Mygla” grupa sovam jau īrostajam dailradis stylam pīvīnoj vysaidus jaunus elementus, kas kompozicejom pīškir plašuoku skaniejuma boguoteibu. Vaira ar albumu “Mygla” var īpasazeit Silvestra Solovjeva apskotā ITE.

Vīna nu pārnejuo gods spūdruokūs grupys rodūšuos darbeibys nūtikšonu beja koncertprogramys “Veļi” atskaņuošona Daugovpiļs kulturvītā “V- 13.” Koncerts izapeļneja cylvāku interesi i atsauceibu, i kluotīnē tū apmeklēja vysaidu paaudžu i interešu puorstuovi. Koncertā grupa klauseituojim snēdze vareibu izbaudeit i cytaižuoku skaniejumu, kas atsaškeire nu grupai rakstureiguo, taidā veidā atkluojūt i paruodūt sevi nu cyta skotpunkta. Vaira par koncertu var puorskaiteit ITE.

Vysus Latvejas Metalmuzikys goda bolvai īsyuteitūs dasacejumus žureja izviertēja i izvierzeja nominantus pīcuos kategorejuos. Uzvarātuoju nūsoka kai žurejis viertiejums, tai klauseituoju bolsuojums. Par sovim favoritim var bolsuot leidz 2026. gods 1. februaram ITE. Uzvarātuoji tiks nūskaidruoti apbolvuošonys ceremonejā 13. februarī, kas nūtiks klubā “Melnā piektdiena” (Breiveibys īla 193c, Reiga).

“Varang Nord” ir latgalīšu folk/ death metala grupa nu Daugovpiļs, kas muzykali dorbojās jau vaira nakai 11 godu. Suokumā grupa sovā dailradē izmontuoja krīvu volūdu, vystik piečuok pīsavērse latgalīšu volūdai. Itūšaļt “Varang Nord” sovys dzīsmis puorsvorā roksta latgaliski, tai ījamūt nūzeimeigu vītu latgalīšu metalmuzykys pasaulī.