Rokstu sagataveja: portals lakuga.lv

Ituo gods 7. junī Latgolys viestnīceibā “Gors” nūtiks Igauņu saimis kapelys 35 gadu jubilejai veļteits koncerts “Tu munā sirsneņā”, kurā izskanēs kai latvīšu i latgalīšu tautysdzīšmu apdaris, tai ziņgis i ari originaldzīsmis. Taipat itys koncerts byus eipašs ar tū, ka tiks svieteitys vasalys divejis jubilejis.

Igauņu saimis kapelā dorbojās pīci diveju paaudžu muzykanti: Rasma i Gunārs Igauni, kai arī jūs meitys Liene, Marta i Laima. Jī kūpā muzicej jau ilgu laiku, snādzūt cīši lelu īguļdejumu latgalīšu tautys muzykys populariziešonā i tradiceju uzturiešonā, kai ari ziņgu īraksteišonā i atskaņuošonā. Taipat interesants ir fakts, ka vysi saimis lūcekli kai aktivi dorbojās muzykys jūmā, tai turpynoj pylnveiduot sovu muzykalū izgleiteibu.

Par muziciešonu vīnā saimē meita Liene Brence stuosta: “Kod mes spieļojam Igauņu saimis kapelā, mes kotrys zynam sovus aizdavumus – mama Rasma organizatoriskuos i saturyskuos lītys uzajam, meitys i tāvs Gunārs kai spieļmani. Kod mes ar muosom spieļojam, tod mums cytaižuok nūteik procesi – vīna atbiļd par vizualū tālu, ūtra par muzyku, trešuo par koncertu vītom. Kod vysim sadaleiti sovi aizdavumi, tod nav i dūmstarpeibu – vyss cīši vīnkuorši! Ka palīc vacuoks, tod nūvērtej – ka nasaīt vysim kūpā sasatikt kasdīnā, tod vysmoz saīt iz skotivis.”

Svātku koncertā izskanēs kapelys darbeibys laikā izpiļdeituos dzīsmis – kai latvīšu i latgalīšu tautysdzīšmu apdaris, tai ziņgis i ari originaldzīsmis. Itei dīna byus pavysam eipaša, kam tiks svieteita i Igauņu saimis kapelys 35 godu jubileja, i ari jūs meitu grupys “Muosys” desmit godu jubileja.

“Koncertā akcentu līkam iz Igaiuņu saimis kapelu, i mes ar “Muosom” īmam kluot. Nūsaukums itam koncertam jimts nu muzykys albuma ar taidu pat nūsaukumu. Tī izskanēs šmukuokuos, vaira spālātuokuos i popularuokuos dzīsmis,” tai par gaidomū koncertu soka Liene.

Grupa “Muosys” izaveiduoja pamozam, i tamā muzicej Igauņu saimis treis muosys – Liene Brence, Marta Šegina i Laima Maslova. Originalkompozicejis i tautysdzīšmu apdaris veiduotys vysaidu stylu sakausiejumā, taidā veidā rodūt īspiejami saistūšu formu myusu dīnu klauseituojam.

“Koncerts byus stuosts, kai kapela laika gaitā ir veiduojusēs. Suokuos vacuoki spēlēja divatā, vāluok pasaruodeja i pīsabīdruoja bārni. Niu jau asam ari kai kolegi. Itys byus vīns sirsneigs i prīceigom nūskaņom apveits pasuokums, kur saīs īsavērt myusu saimis stuostā. Aicynuosim klauseituojus saredzēt lobuos lītys i puordūmuot tū, kai byut itymā laikā,” dasoka Liene.

Koncertā pīsadaleis ari Rēzeknis deju kolektivi “Vadži” i “Dziga”, ar kurim saime sasadorbuojuse jau daudzu godu garumā i kuri sovom horeografejom izmontoj Igauņu saimis kapelys īrokstus. “Ar jim mes asam cīši daudzi braukuši iz vysaidim festivalim i kūpā uzastuojuši. Muns tāvs Gunārs rakstejs muzyku Ilmāra Dreļa horeografejai. Bejušys vysaidys sadarbeibys i koncerti,” tai Liene.

Igauņu saime īt nu Rēzeknis nūvoda Gaigalovys. Īprīšk koncertzālis “Gors” apmaklātuoji ar jim sasatykuši i 2016. gods Leldīnē, i 2017. gads Zīmyssvātku laikā. Viens nu leluokūs izaicynuojumu saimei bejs 2009. gods rudinī, pīsadolūt LNT reikuotajā dzīduošonys šovā “Dziedošās ģimenes”. Taipat saime ir veiksmeigi startējuse “Latvijas šlāgeraptaujā”, tagad ari “Latvijas sirdsdziesmā”. Igauņu saimis kapela ir īrakstejuse divejus albumus – “Vysi zīdi pļaveņā” i “Tu munā sirsneņā”, sovutīs meitys izlaidušys albumu “Ceļā”.

Igauņu saime prīcuosīs klauseituojus redzēt sovā jubilejis koncertā, kab kūpeigi īskandynuotu Saulgrīžu mienesi, kai ari sirsneigā i ļusteigā jutūnē nūsvieteitu sovus svātkus. Beletus iz koncertu var nūpierkt ITE. Tok, ka itam datumam īplanuotys cytys nūtikšonys, tod kapelu varēs satikt ari 16. majā Salacgrīvā, 23. junī Veremūs i 25. julī Valmīrā. Tok grupys “Muosys” tyvuokī koncerti byus 4. majā Viļānūs i 17. junī Jākubpilī.