Rokstu sagataveja: portals lakuga.lv

Īsuocūt ceļu iz Pīterdīnys gaideišonu, teik izsludynuots kasgadejais dzejnīkam Pīteram Jurciņam veļteitais literatu konkursu. Itūgod konkursā kai jauni, tai pīredziejuši literati aicynuoti īsnēgt dorbus dzejis, bārnu i pusaudžu literaturys, kai i humoreskys žanrūs. Dorbus var īsnēgt da 10. juņa, bet uzvarātuojs kotrā nu treju kategoreju tiks paziņuots tradicionalajā Pīterdīnys pasuokumā Rēzeknis nūvoda Rogovkā 29. junī.

Literarais konkurss, lai gūdynuotu dzejnīka, nūvodnīka Pītera Jurciņa (Pētera Jurciņa) pīmiņu, aizasuoce 2004. godā i niu palics par īrostu kulturys nūtikšonu goda daļu, Pīterdīnys pasuokumā Rogovkā izceļūt ari myusu dīnu literatu dorbus. Pīters Jurciņš (1932–2004) beja labi pazeistams kai dzejnīks, tai i jaunūs literatu atbaļsteituojs. Tradicionali konkursā teik gaideiti dorbi dzejis žanrā, jemūt vārā pārņ veiksmeigi aizsuoktū humoreskys žanra veicynuošonu, itūgod konkursa daleibnīki aicynuoti īsnēgt dorbus ari jimā, bet bārnu literaturys vierzīņs teik papyldynuots ar izsvoru iz literaturu pusaudžim, kuruos latgaliski itūšaļt vyspuor nav. Konkursa dorbim nav kaida vīna temata, bet dreikst īsadvesmuot nu Jurciņa dzejūļa fragmenta, kas publicāts kruojumā “Vasala, muos, vasals, bruoļ!” (2002) i ir ituo gods konkursa moto: “Cylvāks vaicoj cylvāka, gors vaicoj gora”.

Pīteram Jurciņam veļteitū literatu konkursu reikoj Rēzeknis nūvoda Kulturys i turysma puorvaļde, Nautrānu apvīneibys puorvaļde (Rēzeknis nūvoda pošvaļdeibys īstuode) i latgalīšu kulturys kusteiba “Volūda”. Konkurss ir daļa nu literaruos jaunradis latgaliski veicynuošonys pasuokumu programys, kurū nu 2024. gods ar vairuoku sadarbeibys partneru atbolstu eistynoj “Volūda”. Ari itymā godā paradzāti treis latgalīšu literaturys kustynuošonai veļteiti literarī konkursi – niu izsludynuotais P. Jurciņam veļteitais konkurss, dzejis slams “Rogovkys dzejis voga”, kai i sadarbeibā ar Latvejis Rakstnīku savīneibu i festivalu “Prozas lasījumi” par tradiceju palykušais konkurss “Latgolys prozys skaitejumi”.

Pīters Jurciņš raksteja dzeju (ari bārnim), spēlēja teatri, muzicēja i dzīduoja, taipat naiztryukstūša juo dzeivis daļa beja humors – ituos vysys sferys sasasauc ar konkursa literarūs žanru vierzīnim. Jamūt vārā ari publiski izskaniejušūs redzīņus, ka latgalīšu literaturā datryukst dorbu pusaudžim, konkursa reikuotuoji itymā godā aicynoj konkursa dalinīkus pīdūmuot pi ituo vaicuojuma, eipaši – pošus jaunīšus paraudzeit raksteit dorbus latgaliski sovim vīnaudžim.

Konkursam jaunus, da ituo napublicātus dorbus voi jūs fragmentus kaidā nu treju kategoreju – dzeja, humoreska voi literatura bārnim i pusaudžim – literati aicynuoti īsyuteit da 10. juņa elektroniski latgalīšu kulturys kusteibai “Volūda” iz e-postu: literatura@voluda.lv ar nūruodi “Literatu konkurss 2026”. Dorbus vērtēs vysmoz treis eksperti, bet uzvarātuoju kotrā nu kategoreju paziņuos Pīterdīnys pasuokumā Rogovkā 29. junī, kod tiks gūdynuoti Nautrānu pogosta Pīteri, kurūs vydā ari Pīters Jurciņš. Lobuokūs dorbu autori kotrys sajims premejis 100,00 eiro apmārā nu Nautrānu apvīneibys puorvaļdis, kai ari atleidzeibu nu latgalīšu kulturys kusteibys “Volūda” par dorba (voi juo fragmenta) publikaceju latgalīšu kulturys ziņu portalā lakuga.lv 200,00 eiro apmārā. Paradzātys ari cytys specbolvys, kai i sovu simpateju apbolvuos “Latgalīšu volūdys, literaturys i kulturviesturis školuotuoju asociaceja”.

Ar pylnu Pīteram Jurciņam veļteituo literatu konkursa nūlykumu var īpasazeit Rēzeknis nūvoda sātyslopā rezeknesnovads.lv, latgalīšu kulturys ziņu portalā lakuga.lv i latgalīšu kulturys kusteibys “Volūda” sātyslopā voluda.lv. Saite iz nūlykumu ari ITE.

Konkursa nūtikšonu atbolsta Rēzeknis nūvoda pošvaļdeibu, bet latgalīšu kulturys kusteibys “Volūda” latgalīšu literaturys veicynuošonys aktivitatem 2026. godā tolkā īt Vaļsts kulturkapitala fonds.