Rokstu sagataveja: portals lakuga.lv

“Pazudušū pādu retrospekcejis” autori Ričards Benislavskis i Edijs Strušels ir radejuši jaunu četru sereju stuostu, kurū nūsaukuši par “specepizodem”. Kai stuosta poši autori, jaunuo apskota maršruts Rubona–Dubna ir kai tylts storp “Žyka” bolvu sajāmušū pyrmū projekta sezonu i iz prīšku plānuotū ceļu pa Zīmeļlatgolu.

Suocūt nu 15. maja, kotru pīktdīni izīs jauna “Pazudušū pādu retrospekcejis” epizode, kūpā tuos byus četrys. Kotra sereja byus aptyvai 30 minušu gara. Projekta autori stuosta, ka epizožu dažaideiba breineigi atspīgeļoj Latgolys daudzkulturalismu i vysaiduos škautnis, kurys var īpazeit, verūtīs mums vysapleik. Edijs Strušels atkluoj, ka ituos epizodis tyka fiļmātys pyrmuos sezonys laikā ci 2024. gods vosorā. Tok tuos natyka īkļautys pyrmajā sezonā, kam pīrūbeža maršruta stuosts beja stypri atškireigs. “Itūs sereju rezultats defaultā ir cytaižuoks. Atmiņā palīkūšuokais laikam byus gasteišona Arendolē i tys, ka kotru reizi juolauž rūbeži, kab nazkur tikt. Tok kotra epizode i kotrys satyktais cylvāks ir cīši eipašs. Ir stuosts par prīsteri, kurs pats varganis sataiseja, taipoš, zynoms, ir kaida daļa stuostu, kas palīk aizkadrā i nav īmontāti, koč voi tys, ka mes najauši tykom vacpuišu balleitē,” doluos Edijs Strušels. Pyrmuo epizode ir stuosts par Latgolys dīnavydim – Rubonys ci Daugovys kreisū krostu.

“Vīns nu sarežgeituokūs aizdavumu ir spēt nasaleidzynuot. Nasaleidzynuot ar īprīškejū sezonu, nasaleidzynuot ar sūpluok asūšū vītu, deļtam, ka mes kotrys asam ar nazkū eipaši i saleidzynuošona taišni naļaun izbaudeit vysus nūtykumus sovā eipašajā nūkruosā. I nūkruosys epizodēs byus eistyn dažaidys,” tai Edijs Strušels. Serejuos byus stuosti par vysaiduokim kulturviesturis objektim i cylvākim, taipoš byus radzami breineigi dobys skoti.

Atguodynuosim, ka 2024. godā Ričards Benislavskis i Edijs Strušels izveiduoja sešu raidejumu cyklu par Latgolys pīrūbeža apceļuošonu. Kluotyn vēļ Edijam topa ari muzykys albums ar nūsaukumu “(Pi)Rūbeža”. Pyrmuo sezona viestej par Latgolys pīrūbeža apceļuošonu maršruta pūsmūs Leidumnīki–Zylupe–Ezernīki–Indra–Pīdruja. Vysys epizodis var nūsavērt ITE. 2024. godā “Pazudušū pādu retrospekceja” dabuoja ari Latgalīšu kulturys goda bolvys “Boņuks” publikys simpateju bolvu “Žyks”.