Rokstu sagataveja: portals lakuga.lv

Šudiņ, 18. majā, teik svieteita Storptautyskuo muzeju dīna, sovutīs nedeļgolā gaidoma nu jau par tradiceju palykušuo Muzeju nakts. Deļtuo ituos nedelis kulturys īsacejumu autore ir Zane Grudule – Memorialūs muzeju apvīneibys komunikacejis specialiste i Latvejis Muzeju bīdreibys vaļdis lūcekle. Zane īsoka izbaudeit kai Muzeju nakti, tai hokeja pavasari.

Muzeju nakts

23. majā vysā Latvejā nūtiks Muzeju nakts – vīns nu skaistuokūs vokoru godā, kod varams bez moksys apsavērt muzejus i cytys īstuodis syltā vokora gaismā i pavysam cytā jutūnē. Ituo gods vīnojūšuo tema ir “Prīškmata pīdzeivuojums”, aicynojūt muzejus izceļt stuostus, kas dzeivoj prīškmatūs, atmiņuos i vidē.

Muzeju naktī sovys durovys attaiseis viesturei, muokslai, rakstnīkim, dzierīnim i nūvodpietnīceibai veļteitī muzeji. Ka redzīs, ka – ai, vīnu reizi jau asu bejs muzejā, deļkuo īt vēļreiz –, tycit maņ, ir juoīt! Skanēs koncerti, sarunu vokori, eipašys programys bārnim i saimem, kai ari ekskursejis vītuos, kas kasdīnā na kotram ir daīmamys. Pīmāram, Bolvu nūvoda muzejā byus vydslaiku bruninīku ceiņu paraugdemonstriejumi, Baļtinovys muzejs aicynoj iz nakts puorguojīni, bet Raiņa muzejs “Jasmuiža” aicynoj uz pavysam veļnišku nakti.

Plašuoku Latvejis Muzeju nakts programu, tymā skaitā i Latgolys muzeju pīduovuojumu, var apsavērt ITE.

Na-muzejiska Muzeju nakts

Ka vysi muzeji jau apsavārti, 23. maja vokorā iz naīrostuokim Muzeju nakts pīdzeivuojumim aicynoj ari cytys īstuodis i uzjāmumi.

Itymā vokorā nu 19 stuņžu “Rēzeknis Bryuvera” uortelpā skanēs muzyka, byus vysaidys aktivitatis, “Ausmeņa kebabs” nūdrūsynuos gordu iedīni, putuos tikū nu ryupneicys guojs ols i kvass. “Muzejiskuokai” vokora jutūnei dareitovys telpuos varēs īpazeit tematiskū ekspoziceju “Laika Paka”, kur apsaverami Latvejis teritorejā ražuoti voi īvasti viesturyski puortykys īpakuojumi – na tik etiketis i pakys, tok vasals laikmats i stuosts ar garšu.

Iz Muzeju nakti nu 19 stuņžu aicynoj i Vaļsts policejis Latgolys regiona puorvaļde Daugovpiļs cītūkšņa teritorejā, kur byus apsaverama eipaša kuopņu telpa ar čuguna trepem. Itei varātu byut unikala vareiba pošam piec sovys iniciativys i breivpruoteigai apmeklēt policejis telpys.

Hokeja pavasars

Munā saimis i paziņu lūkā hokeja vieršonuos nūteikti ir kulturys nūtikšona. Patriotismys syt augstu viļni, eikši ir nūmīgti zyli, hokeja spēlis teik namiteigai straumātys viļcīnī, kora mieginuojumā i sātā, paraleli sasatraucūt, voi vactāva i ari muna sirds izturēs ituos rezultatu piruetis. Apriekini par tū, kurai komandai juouzvar i kurai obligati juozaudej, kab mes otkon pīsatyvuotu 2023. gods eiforejai, mīreigai varātu tikt īskaiteiti kai 12. klasis matematikys centralizātais eksamens.

Izcepit casnāgu grauzdeņus nu cegleņa i vēļ pārnejuo gods casnāgu, pajemit vactāva veseleibys dzierīni, kas stuov nūglobuots zam vyrtuvis golda, īsliedzit LTV7 i teicit par divana ekspertim iz valna paraušonu.

I ejte uorā! Zīd uobeļneicys, besakūki i pīninis, i saule audzej pyrmūs vosorys raibumus. Tik īsvīdit kuldā kaidu centu (i vālams ari babys captu kotletu) – kab dzagiuze naaizkiukoj! Sasateikam muzejūs!