Nu 5. da 7. februara izstuožu centrā Kīpsolā nūtiks 23. storptautyskuo turisma izstuode – godatiergs “Balttour 2016”, kurymā sovu turisma pīduovuojumu tradicionali prezentēs ari Latgolys regions, informej Latgolys regiona atteisteibys agenturys turisma koordinators Edgars Kluss.

Pasasokūt Latgolys regiona atteisteibys agenturys i Latgolys planavuošonys regiona mierktīceigam dorbam, kai ari Latgolys pošvaļdeibu atbolstam, regiona stendā tiks ītvarts plašs turisma pīduovuojums, kas daīmams Latgolā – naktsvītys, apsavieršonys objekti, aktivuo turisma vareibys i cytys lītys.

Latgolys stendā izstuodis laikā dorbuosīs ari omotnīki i senejūs omotu meistari. Keramiks Valdis Pauliņš demonstrēs procesu, kai teik radeita Latgolys tradicionaluo keramika, sovu meistareibu paruodeis Ludzys omotnīku centra puorstuovi, Leivuona Muokslys i omotnīceibys centrys sagatavejs apmaklātuojim stykla muokslys darbneicu. Taipat izstuodē pīsadaleis Gunārs Igaunis ar sovu muzykys instrumentu darbneicu, kai ari Leļu karaļvaļsts puorstuovi nu Preiļu. M. Rotko muokslys centra puorstuovi īsaisteis lelūs i mozūs izstuodis apmaklātuojus grafikys darbneicuos, nu ar senejūs latgaļu dzeivisveidu izstuodis apmaklātuojus sapazeistynuos Kroma kolna bruoliste. Pyrmūreiz “Balttour” izstuodē byus puorstuovāts ari vysys Latgolys sporta lapnums – spīdveja klubs “Lokomotīve”, kas 2015. godā Pūlejis Nice spīdveja ligā.

Kasgadejuo izstuode “Balttour” ir vīna nu nūzeimeiguokūs goda nūtikšonu Baļtejis vaļstu turisma nūzarē. Izstuodē pīsadola 470 eksponentu i 850 daleiborganizaceju nu 40 Eiropys, Centraluos Āzejis i Tyvūs Austrumu vaļstim. Izstuodis organizatori prognozej, ka itymā godā tū varātu apmeklēt ap 30 tyukstūšom cylvāku.