“Muokslinīka originaluo tehnika apvīnoj grafiku i gleznīceibu. Ekspresivuos gleznys ar spylgtu, bleivu fakturu puorsteidz ar naparostu kruosu paleti, konstruejūt telpu, kas saista skateituoju i roda emocejis. Kruosu i gaismu sasaveišonys sluoņus Čačka izmontoj, kab radeitu dziļuma iluzeju. Caur itim sluonim mes īsadzilinojam muokslinīka personeigajā pasaulī, kas ir pylns ar smolkom, vuordūs natveramom niansem. Izstuodis nūsaukums “Sajiutu nūjausma” izsoka tū, kū navar apraksteit vuordūs, bet var sajust caur maņom,” roksta Varšavys izstuodis kuratore Anna Klosa.

Pats Māris Čačka nūruoda, ka izstuodis nūsaukums “Sajiutu nūjausma” ir sovā ziņā filozofiski apveits i viestej par nūjausmom, kas raksturoj tuos sajiutys, kas jam bejušys rakstureigys periodā, kod radeiti konkretī dorbi. Varšavā pamatā byus apsaverami pavysam jauni muokslinīka dorbi. “Tī puorstuov munu izteiksmi iz audakla, kai pādejūs pīcu godu laikā asu struoduojs, līkūt kūpā gleznīcyskūs i grafiskūs medeju savīnuojumu, atsluoņojūt i sluoņojūt kompozicejis i pīdūmojūt par personeigajom sajiutom, kas mani ītekmej. Tok asu atsagrīzs ari pi grafikys kompoziceju rysynuošonys iz papeira, kas varātu byut ituos izstuodis pīvīnuotuo vierteiba. Galerejā ir divejis zālis, vīnā byus taišni iz papeira drukuoti dorbi. Tys vēļ vaira paspylgtynoj rūkroksta leidzeibu – kai tū tehniski īspiejams rysynuot kai gleznīcyski grafiskajā tehnikā iz audakla, tai drupeit mozuokā formatā, izmontojūt tradicionaluos augstspīduma tehnikys īzeimis dorbā iz papeira. Tamā ir ari daži kongriva elementi, reljefdrukys īzeimis,” raksturoj Māris.

Muokslinīks stuosta, ka sovus iz audakla drukuotūs dorbus apzeimej ar divejim latiņu burtim, tai veidojūt hronologeju i dorbu atškireibys nūsaceišonys vareibu, jo kombinacejis ļaun ari cytu reizi atkuortuot tū pošu. Tok kotrys nūvylkums iz papeira itūreiz apzeimāts ar divejim ciparim. “Tys īzeimej maņ sajiutu leiminī nūzeimeigus ciparus, kas saistuos ar munu saimis lūcekļu dzimšonys godim i tamleidzeigai,” skaidroj Māris Čačka.

Itūgod Mārim paradzāta vēļ vīna izstuode Pūlejā – 1. martā tiks atkluota formata i satura ziņā vēļ leluoka izstuode Belostokys piļsātys galerejā. “Tys beja pyrmais uzaicynuojums. Piec sarunu ar pūļu sadarbeibys partnerim Belostokā maņ nagaideitai daguoja uzaicynuojums ar tim pošim voi cytim dorbim izastuodeit ari privatgalerejā Varšavā. Tys maņ kai muokslinīkam beja pagūdynuojums – paruodeit sovu daiļradi ari Pūlejis golvyspiļsātā. Prūtams, ar tim pošim dorbim pīsadaleit navarieju, jo obejis izstuodis puorsakluoj – Varšavys izstuode byus apsaverama da 31. marta.”