28. junī 15 stuņdēs Rotko muzeja Omotu sātā ar keramikys cepļa attaiseišonu i folklorys kūpys “Dyrbyni” koncertu tiks svieteita jaunys keramikys ekspozicejis atkluošona.

Ekspoziceja “Latgales māla kods” apkūpoj pīcpadsmit Daugovpiļs keramikys studejis “Latgale” dalinīku dorbus daudzsluoņainā vizualā līceibā par regiona keramikys tradiceju nūtureibu, atteisteibu i puormontuojameibu. Ekspozicejā apsaverami Lilijis Zeilis, Ligitys Paknis, Nellijis Dzalbys, Juoņa Saikovska, Marijis Saikovskys, Unys Gurys, Mairitys Folkmanis, Ilonys Abdulajevys, Ilonys Šaušys, Veronikys Rumjancevys, Aivara Baranovska, Valentīna Petjko, Romāna Saikovska, Eleonorys Pastaris i SANRI dorbi. Kotrys muokslinīks pīduovoj individualu i myusdīneigu skotu iz keramikys materiala vareibom, reizē saglobojūt cīšu saikni ar Latgolys keramikai rakstureigū formu volūdu, ornamentiku i tehnologiskajom tradicejom.

Jaunuos ekspozicejis atkluošonys svātku programu kuplynuos malnuo keramikys cepļa attaiseišona ar svaigi apdadzynuotū, vēļ korstū trauku izjimšonu. Par cepļa kūršonu i iztukšuošonu atbiļdeigs byus pūdnīceibys omota meistars Ilmārs Vecelis.

Par muzykalū jutūni ryupēsīs Augšdaugovys nūvoda kulturys centra “Vārpa” folklorys kūpa “Dyrbyni”, duovojūt latgalīšu dzīšmu i daņču izlasi.

Īīšona pasuokumā byus bez moksys.