11. oktobrī Baļtinovys Paaudžu centrā nūtyka Danskovītis (Anitys Ločmelis) lugu gruomotys “Ontans i Anne” attaiseišonys svātki. Sveicieju puļceņā beja Baļtinovys nūvoda dūmis prīšksādātuoja Lideja Siliņa, Baļtinovys amatīrteatra “Palādas” kolektivs, Baļtinovys nūvoda i vydsškolys bibliotekaris, Anitys Ločmelis tyvuokī saimis cylvāki i gruomotys ilustraceju autore Galina Gruziņa.

Gruomota izdūta, pasasokūt Latgolys regiona atteisteibys agenturys, Vaļsts Kulturkapitala fonda i a/s “Latvijas valsts meži” finansialam atbolstam, projekta īsnīdziejs – bīdreiba “Sukrums”. Gruomotā apvīnuotys 8 lugys dalis. Tys ir naparosts kruojums, i tū aplīcynoj teksta izkuortuojums, kur Baļtinovys izlūksne, kas ir traknrokstā, mejās ar latvīšu literarū volūdu, partū lugys skaiteišona i īstudiešona īspiejama vysim, kuri tik tū gribēs.

Gruomota var byut lobs materials volūdnīkim i sevkuram interesentam, studejūt latvīšu volūdys izlūksnis. Tei ir ari arhivs, kurymā globuosīs latgalīšu volūda Baļtinovys izlūksnis formā, ituo laikmata lauku sadzeive, nūtikšonys, tradicejis i latgalīša vierteibys.

Gruomotys ilustratore Galina Gruziņa kotrys dalis suokuos ir īlykuse karikaturu, kas sasasauc ar lugys nūtikšonom.

Prezentacejā autore smaļči izstuosteja gruomotys veiduošonys gaitu. “Niu es zynu, kai tūp gruomota i cik daudz dorba tī juoīlīk,” secynuoja Danskovīte. Iz svātkim atguojušī sajēme duovonā juos gruomotu.

Tei ir ūtruo Danskovītis lugu gruomota, nu pyrmuo, kuruos izdūšonu kuortoj jei poša, partū ka kruojuma “Lugas” ( 2008) publiciešonu vadeja dzejnīks Ontons Slišāns.

Danskovītis gruomota “Ontans i Anne” jau ir atrūnama vysuos leluokajuos Latvejis piļsātu bibliotekuos, nu Latgolā – ari nūvodu bibliotekuos.