Portals lakuga.lv atsuoc darbeibu ar jaunu komandu

Portals lakuga.lv atsuoc darbeibu ar jaunu komandu

Rokstu sagataveja: portals lakuga.lv

Leidza ar apreli piec puora mienešu pauzis ar jaunu komandu dorbu atsuoc ari latgalīšu kulturys ziņu portals lakuga.lv. Portala darbeibu nu 2021. goda apreļa da goda beigu mierkprogramā “Kulturys nūzaris dokumentiešona” atbolsta Vaļsts kulturkapitala fonds.

Sovu dorbu portalā goda suokumā beidze portala ilggadejuo vadeituoja i redaktore Vineta Vilcāne, leidza ar tū puora mienešu lakuga.lv beja klusuma pauzē, bet niu, apreļa suokumā, portals dorbu atsuoc. Pi portala satura, latgaliskuos kulturys aktualitašu informacejis pasaruodeišonys, kai ari lakuga.lv atteisteibys kai pošā portalā tai socialajūs teiklūs niu struoduos Sandra Ūdre, Sintija Augustova i Edeite Husare. Žurnaliste, latgalīšu rokstu volūdys specialiste i literate Sandra Ūdre, kurai dorbā lakuga.lv jau ir vairuoku godu pīredze kai žurnalistei i korektorei, niu uzajims portala redaktoris pīnuokumus, kai žurnaliste portala komandā atsagrīž Sintija Augustova, kurei ir ari Latvejis Radejis Latgolys studejis jaunīšu raidejuma “Pīci breinumi” komandys daļa, bet kai portala socialūs teiklu redaktore i portala atteisteibys vadeituoja niu struoduos marketinga specialiste i latgaliskūs projektu vadeituoja Edeite Husare.

Latgalīšu kulturys ziņu portala lakuga.lv darbeibu 2021. godā, ļaunūt koč i dalejā slūdzē, bet pastuoveigi nūdrūsynuot redaktora, žurnalista i atteisteibys dorbu, kai ari veicynojūt uorštata autoru rokstu topšonu, mierkprogramā “Kulturys nūzaris dokumentiešona” atbolsta Vaļsts kulturkapitala fonds (VKKF). Portala darbeibys nūdrūsynuošonai 2021. godā VKKF daškiertais finansiejums ir 20 000 eiro, kas ļaus dokumentēt latgaliskuos kulturys nūtikšonys, aktivitatis leidz 2021. goda beigu.

Portala atteisteibys vadeituoja Edeite Husare, īsuocūt dorbu lakuga.lv, soka: “Vysa pyrma lels paļdis portala lakuga.lv ilgu godu vadeituojai i redaktorei Vinetai Vilcānei par īguļdejumu portala atteisteibā! Pasasokūt Vinetai portals ir mainejīs, atsateistejs i dabuojs stabilu vītu Latvejis kulturys nūzaris medeju vydā. Niu portala komandys aizdavums ir aizsuoktū turpynuot. Kai vīns nu portala darbeibys leluokūs izaicynuojumu īprīšk beja finansiejuma pīsaiste stabilai portala darbeibys nūdrūsynuošonai, i taisni jaunuo VKKF mierkprograma ir spieceigs atbolsts, lai portals var dareit iz prīšku, atsateisteit i informēt par latgaliskuos kulturys procesim.”

Medeju “Latgalīšu kulturys ziņu portals lakuga.lv” uztur i darbeibu nūdrūsynoj bīdreiba “LgSC”, kura jau vaira nikai 15 godu eistynoj dažaidus ar latgalīšu volūdys saglobuošonu, atteisteišonu i populariziešonu saisteitus projektus. Portals lakuga.lv sovu darbeibu izsuoce 2007. godā, tys vys vēļ ir vīneigais medejs pasaulī, kura saturs teik sagataveits tikai latgalīšu rokstu volūdā – viesturiskā latvīšu volūdys paveidā.

Ar portala redakceju var sasazynuot, rokstūt info@lakuga.lv – teik gaideita informaceja par aktualitatem Latgolā i latgaliskajā kulturā vysā pasaulī. Latgaliskuos kulturys informaceju var skaiteit portalā http://lakuga.lv, kai ari sekuot leidza socialūs teiklu profilūs facebook.com/lakuga.lv, instagram.com/voluuda, twitter.com/lakuga, kai ari “Telegram” kanalā t.me/latgaliski.

Print Friendly, PDF & Email

Nūtikšonu kalendars

Dec
1
Tre
vysu dīnu Dasasaceišona konkursam “Latgoly... @ Tīšsaistē
Dasasaceišona konkursam “Latgoly... @ Tīšsaistē
Dec 1 vysu dīnu
Dasasaceišona konkursam "Latgolys prozys skaitejumi 2021" @ Tīšsaistē
Da ituo gods 1. decembra var pīsadaleit konkursā “Latgolys prozys skaitejumi 2021” var, īsnādzūt dorbus – esejis, stuostus, romanu fragmentus (7000–12 000 zeimu apmārā) i syutūt tūs bīdreibai “LgSC” iz lgsc@lgsc.lv ar nūruodi “Latgolys prozys[...]
Dec
4
Sai
17:00 “Gūdi” Upītē @ Namaterialuos kulturys centrs "Upīte"
“Gūdi” Upītē @ Namaterialuos kulturys centrs "Upīte"
Dec 4 @ 17:00 – 18:00
"Gūdi" Upītē @ Namaterialuos kulturys centrs "Upīte"
Ituo goda 4. decembrī Namaterialuos kulturys montuojuma centrā “Upīte” byus Namaterialuos kulturys montuojuma svātki “Gūdi”, kurūs sveiks i gūdynuos cylvākus, kas atbolsta i veicynoj “Upītes kulturtelpu”. Taipoš byus ari starpdisciplinars koncerts ar vairuoku muziku apvīnuojumu[...]
19:00 Grupys “Baltie lāči” koncertprog... @ Jelgavys Kulturys noms
Grupys “Baltie lāči” koncertprog... @ Jelgavys Kulturys noms
Dec 4 @ 19:00
Grupys “Baltie lāči” koncertprograma “Tirgus stāsti” @ Jelgavys Kulturys noms
Grupa “Baltie lāči” aicynoj iz jaunu koncertprogramu “Tirgus stāsti”. Itymā naparostajā tiergā ir vareiba saklauseit i izjust vysu, kū sirds gryb – gon dzīsmis i dzeju, gon smīklus i osorys. Ar dzīsmem i dzeju izdaiļuots,[...]
Dec
12
Svā
15:00 Konkursa “Latgolys prozys skaite...
Konkursa “Latgolys prozys skaite...
Dec 12 @ 15:00
Konkursa “Latgolys prozys skaitejumi 2021” nūslāguma pasuokums
Kab veicynuot literarū procesu Latgolā, dūdūt vareibu latgalīšu rokstu volūdā voi latvīšu literarajā volūdā rokstūšim autorim satikt leluoku auditoreju i skaiteituojim īpazeit jaunus Latgolys kulturtelpā topušus dorbus, bīdreiba “LgSC” jau ūtrū godu izsludynoj konkursu “Latgolys[...]
Dec
18
Sai
19:00 Koncerts “Celīs, bruoļ!” @ Latgolys viestnīceiba "GORS"
Koncerts “Celīs, bruoļ!” @ Latgolys viestnīceiba "GORS"
Dec 18 @ 19:00
Ituo gods 18. decembrī 19.00 stuņdēs Latgolys viestnīceibā “GORS” byus koncerts “Celīs, bruoļ!”, kurā skanēs dzīsmis nu Latgolys Kongresa 100-gadis albuma “Celīs, bruoļ!” i cytys skaneigys dzīsmis. Koncertā pīsadalēs puorstuovji nu taidom grupom kai “The[...]